शाक्यमुनि वज्राचार्यया मूलचक्रेश्वराभिषेक

येँ – येँ देय्या वज्राचार्य गुरुजुपिं मध्ये दकलय् थकालिम्ह चक्रेश्वर शाक्यमुनि वज्राचार्ययात आइतवाः देय्थाय्पा मुखः पुइकाः ‘मूलचक्रेश्वराभिषेक’ याःगु दु । क्वाबहालय् जूगु छगू ज्याझ्वलय् राजगुरुजु मञ्जुश्री रत्न वज्राचार्यं मुखः पुइकाः देथाय्पा लुइगु ज्या यानादीगु खः । ज्याझ्वलय् येँ देय्या झिंच्यागू मू बहाःया चक्रेश्वरपिं, झिंखुगू बहीया मूथाय्पा, थाय्पाजुपिं, झिगू शाक्य बहाःया थाय्पाजुपिं, यल, ख्वप, किपू, थिमिया मू थाय्पा आजुपिं लिसें बौद्धविद्वानपिं सहभागी जुयादीगु खः ।

ज्याझ्वलय् राजगुरु मञ्जुश्री रत्न वज्राचार्यं कलाशाभिषेक, मकुटाभिषेक, वज्राभिषेक, घण्ठाभिषेक, गुह्याभिषेक, नामाभिषेक, पुष्पमाभिषेक, छत्राभिषेक बियाः मूलचक्रेश्वर जूगु घोषणा यानादीगु खः । अथेहे बौद्धविद्वान प्रा.डा. नरेशमान वज्राचार्यं अभिषेक गाथा वाचन यानाः, भिम गुरुजुं ज्याझ्वः संचालन यानादीगु खः । ज्याझ्वःया निंतिं मैत्रीपुर महाविहार संरक्षण समिति, नेपाल परम्परागत बौद्धधर्म संघ, कान्तिपुर फ्रेन्डस् अफ शान्तिपुर, त्रिरत्न कोषपाखें ग्वाहालि जूगु खः ।