संघीयतायात सार्थक यायेत भगिनी सम्बन्ध
येँ (नेपालभाषा टाइम्स) – येँ महानगरपालिकां जुम्ला जिल्लाया चन्दननाथ नगरपालिकालिसे भगिनी सम्बनध स्थापना याइगु जूगु दु । येँ मनपां चन्दननाथ नगरपालिकालिसे भगिनी सम्बन्ध स्थापना यायेगु निर्णय याःगुयालिसें अनया नगर प्रमुख कान्तिका सेजुवालसहितया जनप्रतिनिधिनाप सहलह नं याःगु दु ।
येँ मनपा प्रमुख विद्यासुन्दर शाक्यं याकनं हे चन्दननाथ नगरपालिकालिसे नं औपचारिक रुपं हे भगिनी सम्बन्ध स्थापनाया निंतिं सम्झौतापती ल्हाःचिं तयेगु जुइ धकाः सहलहया इलय्धयादीगु दु । येँ मनपा प्रमुख शाक्यं निगू नगर क्षेत्रया जीवन्त संस्कृति, सम्पदा, पर्यटकीय, पर्यावरण क्षेत्रया संरक्षण व संवद्र्धन, विकास व प्रचार प्रसारय् सहकार्य यायेगु जुइ धकाः धयादीगु दु ।
निगू नगर दथुइ भगिनी सम्बन्ध कायम यायेगु सकारात्मक जूगु चर्चा यानादिसें येँ मनपा प्रमुख शाक्यं धयादिल, ‘येँय् आपालं मूर्त व अमूर्त सांस्कृतिक सम्पदात दु । मावन निर्मित सम्पदाया तःमि येँ सांस्कृतिक सहर व कर्णालीया दुर्गम जिल्लाया चन्दननाथ नगरपालिका दथुइ भगिनी सम्बन्ध स्थापना यायेगु थवंथवय् हे सकारात्मक खँ खः ।’
विश्वया आपालं थीथी नगरलिसे भगिनी सम्बन्ध स्थापना यानागु खँ लुमंकादिसें वय्कलं धयादिल, ‘संघीयतायात सार्थक यायेत व बल्लाका यंकेत लिपांगु इलय् थःगु हे देय्या नगरलिसे भगिनी सम्बन्ध स्थापना यायेगु कुतःयात न्ह्यःने यंकागु दु ।’
अन्तर्राष्ट्रिय सम्बन्ध स्वयां देय् दुनेया हे नगरलिसे सम्बन्ध स्वायेगु ज्यां संघीयतायात सार्थक याना यंके फइगु विश्वास प्वंकादिसें वय्कलं थुकथंया अन्तरपालिका भगिनी सम्बन्धं तिबः बीगु अपेक्षा नं यानादीगु दु ।
‘थ्व स्वयां न्ह्यः नं थःपिंसं नगरनगर साझेदारी ज्याझ्वः अन्तर्गत येँया झिगू नगरलिसे साझेदारीया ज्याझ्वः न्ह्याकेधुंगु दु’, येँ मनपा प्रमुख शाक्यं धयादिल, ‘थुकथं हे ख्वपया मध्यपुर थिमि, रामग्राम नगरपालिकालिसे नं भगिनी सम्बन्ध स्थापना यायेधुंगु दुसा आः चन्दननाथ नगरपालिकालिसे नं भगिनी सम्बन्ध स्थापना यायेगु निर्णय यायेधुंगु दु, उपयुक्त इलय् समझदारी पत्रय् ल्हाःचिं तयेगु जुइ ।’
चन्दननाथ नगरपालिकाया प्रमुख सेजुवालं स्रोत व साधनं सम्पन्न देय्या संघीय राजधानी दुगु येँ महानगरपालिकालिसे भगिनी सम्बन्ध स्थापना याये खंगुलिं लसता प्वंकादिसें थःपिनिगु निंतिं थ्व तसकं लसताया ई जूगु खँ धयादिल । वय्कलं धयादिल, ‘निगू नगर दथुइ धार्मिक पर्यटनयात स्वानाः न्ह्यःने वने फइगु जूगु दु ।’
उगु इलय् येँ मनपा उपप्रमुख हरिप्रभा खड्गी श्रेष्ठं नं नुगःखँ तयादीगु खः । थगुने पुस १७ गते च्वंगु नगर कार्यपालिकाया बैठकं चन्दननाथ नगरपालिकासे भगिनी सम्बन्ध स्थापना यायेगु निर्णय याःगु खः ।
थ्व हे झ्वलय् धनकुटाया पाख्रिवास नगरपालिकाया नगरप्रमुख वृषबहादुर राई व जनप्रतिनिधिलिसे भगिनी सम्बन्ध स्थापना यानाः न्ह्याः वनेगु बारे सहलह जूगु दु । लुमंकेबहजू, येँ महानगरपालिकां आतकया दुने विश्वया झिंखुगू नगरलिसे भगिनी सम्बन्ध स्थापना यायेधुंकूगु दुसा पाकिस्तानया इस्लामावाद व थाइल्याण्डया बैंकक सहरलिसे भगिनी सम्बन्ध स्थापना यायेगु प्रक्रियाय् दु ।
LEAVE YOUR COMMENTS