राजु गुरुङया उम्मेदवारी खारेज

येँ (नेपालभाषा टाइम्स)- रुपन्देही निर्वाचन क्षेत्र नं. २ स प्रतिनिधिसभा दुजःया नितिं सत्ता गठबन्धनपाखें दनाच्वंम्ह नेकपा एकीकृत समाजवादीया उम्मेदवार राजु गुरुङया उम्मेदवारी खारेज जूगु दु ।

निर्वाचन आयोगं गुरुङया उम्मेदवारी खारेज यायेगु धकाः सर्वोच्च अदालतं यानातःगु निर्णययात म्हिगः सर्वोच्च अदालतं सदर याना बिउगु खः ।
जिल्ला निर्वाचन अधिकृतया कार्यालयं गुरुङया नां हाकुगु धलखय् लानाच्वंगु दु धासें वय्कःया उम्मेदवारी खारेज याना बीवं गुरुङं सर्वोच्च अदालतय् रिट तःगु खः ।

सर्वोच्च अदालतं रिटया सुनवाइ यासें अल्पकालीन अन्तरिम आदेश जारी याःगु खः । उगु मुद्दायात न्यायाधीशपिं ईश्वरी प्रसाद खतिवडा व कुमार रेग्मीया मंकाः इजलासं खारेजीया निर्णययात सदर याना बिउगु खः ।

सर्वोच्च अदालतया आदेशय् धयातःगु दु, ‘निवेदक राजु गुरुङ उम्मेदवार जुइ मदइगु अयोग्यता कायम हे दनिगुलिं प्रतिनिधिसभाया चुनावय् उम्मेदवार जुइ दइगु अवस्था खने मन्त । हाकुगु धलखय् नां कायम दुम्ह व्यक्ति उल्लेखित निर्वाचन क्षेत्रया उम्मेदवार जुइ मदइगु जूगुलिं निवेदन माग जूकथं अन्तरिम आदेश जारी याये मजिल । अथे जुयाः थुगु अदालतं मिति २०७९ असोज ३० स जारी जूगु अल्पकालीन अन्तरिम आदेशयात
निरन्तरता बीमाःगु मन्त । मेगु कानुन कथं या ।’

गुरुङया लिसे रुपन्देही क्षेत्र नं २ स उम्मेदवारी बिउम्ह कमल भुसालया नं उम्मेदवारी खारेज जूगु दु । उगु निर्वाचन क्षेत्रय् नेकपा एमालेपाखें उपाध्यक्ष विष्णु पौडेलया उम्मेदवारी लानाच्वंगु दु ।