पत्रकार दबूपाखें स्वम्ह मिसा पत्रकार सम्मानित
यल(नेपालभाषा टाइम्स)- नेवाः पत्रकार राष्ट्रिय दबुलिं स्वम्ह मिसा पत्रकारपिंत साधना मिसा पत्रकारिता सम्मान लःल्हाःगु दु । ११३ क्वःगु अन्तर्राष्ट्रिय नारी दिवसया लसताय् दबूपाखें ग्वसाः ग्वःगु ‘संचार ख्यलय् मिसा सशक्तिकरण’ विषयय् जूगु अन्तक्र्रिया ज्याझ्वलय् उगु सम्मान लःल्हाःगु खः ।
मूपाहांकथं झायादीम्ह यल महानगरपालिकाया उपप्रमुख मञ्जरी शाक्य (आस्थां) गोरखापत्र न्हिपौया फोटो पत्रकार कविता थापा, नेपाल टेलिभिजनया अञ्जना शिल्पकार व थाहा एफएमया सन्चुकुमारी लामायात हनापौ देछानादीगु खः । थनया पूच्वस्थित अक्षेयश्वर महाविहारय् जूगु ज्याझ्वलय् दबूया न्वकुलिसें मिसा कवःया संयोजक रचना श्रेष्ठं स्वांमाः क्वखायेकादीगु खःसा नेपाल आदिवासी जनजाति पत्रकार महासंघ (फोनिज)या अध्यक्ष गजुरधन राई दोसल्ला न्ययेकादीगु खः ।
उगु इलय् वरिष्ठ साहित्यकारलिसें प्रज्ञा प्रतिष्ठानया पुलांम्ह दुजः सुलोचना मानन्धर धितालं नेपाःया पत्रकारकथं कयातःम्ह साधना प्रधान अधिकारीया थीथी पक्षयात कयाः थःगु नुगःखँ तयादीगु खः । लिसें वय्कलं थीथी भाय्या साहित्य ख्यःया मिसातय् व्यक्तित्व व योगदानयात कयाः संचारमाध्यमं उचित प्राथमिकता बियाः थाय् बीत नं इनाप यानादिल ।
फोनिजया अध्यक्ष राईं नेपाःया संचारमाध्यमयात समावेशी यायेत, मातृभाषा पत्रकारिताया विकास यायेत राज्य पक्षलिसें स्थानीय सरकारं नं ठोस रुपं ज्या न्ह्याकेमाःगु आवश्यक दु धयादिल ।
क्रियाशील पत्रकार मञ्चया अध्यक्ष संगीता लामां आदिवासी जनजाति मिसा पत्रकारतय्सं नं नेपाःया ततःधंगु संचारमाध्यमय् तक ज्या यायेगु हैसियत दयेकेमाःगु व उकिया निंतिं आवश्यक ज्ञान, सीप, तालिम व क्षमता अभिवृद्धिया निंतिं तालिमत संचालन याना वनेमाःगु खँय् बः बियादिल ।
दबूया केन्द्रीय नायः नृपेन्द्रलाल श्रेष्ठ, मूछ्याञ्जे केके मानन्धर, सम्मानित व्यक्तित्व लामा, ज्याझ्वःया संयोजक रचना श्रेष्ठं राज्यया हरेक निकायय् मिसातय् समानुपातिक प्रतिनिधित्व जुइमाःगु व पत्रकारिता ख्यःया भूमिका नं प्रभावकारी जुइमाःगु खँय् थःथःगु नुगःखँ तयादीगु खः ।
LEAVE YOUR COMMENTS