
येँ (नेपालभाषा टाइम्स) – कारोना संक्रमणया कारणं स्वनिगःन्यंकं बन्द जुयाच्वंगु शिक्षण संस्था छुं छुं चालेगु क्रम शुरु जूगु दु । बन्द जुयाः शैक्षिक कार्यतालिका हे प्रभावित जुइवं संघीय सरकारं स्थानीय तहयात स्कुल चायेकेगु अनुमति बीवं येँया थीथी थासय् स्कुल चायेकेगु शुरु जूगु खः ।
स्वनिगःया नगरपालिका फोरमया सचिव लिसें थिमि नगरपालिकाया मेयर मदनसुन्दर श्रेष्ठं कनादीकथं स्वनिगः दुने नं जनघनत्व म्हो दुगु नगरपालिकाय् स्कुल चायेकेगु शुरु जूगु खः । तर येँ, यल व ख्वप जिल्लाय् जनघनत्व अप्वः दुगु नगरपालिकाय् धाःसा स्कुल चायेकेगु तयारी धाःसा जुयाच्वंगु मदु। वय्कलं धयादी, ‘स्वनिगःया थीथी नगरपालिकां स्कुल चायेकूसां जनघनत्व अप्वः दुगु थासय् स्कुल चायेकेगु सम्भावना मदु । छगू जक स्कुलया मस्त प्रभावित जूसां जिल्ला हे बन्द यायेमाःगु अवस्था वयेफु । अथे जुयाः जनघनत्व अप्वः दुगु नगरपालिकाय् तत्काल स्कुल चायेकेगु सम्भावना मदु ।’
वय्कलं हुम्लाय् छगू स्कुल चायेकेवं उगु स्कुलया आपालं विद्यार्थी कोरोना संक्रमित जुइवं जिल्लाया फुक्कं स्कुल बन्द यायेमाःगु अवस्था वःगु खँ न्ह्यथँसें स्वनिगःया जनघनत्व अप्वः दुगु थासय् स्कुल चायेकेबलय् नं अज्याःगु हे घटना जुल धाःसा उकियात गुकथं व्यवस्थापन यायेगु धइगु समस्या ब्वलने वये फइगु जूगुलिं तत्काल स्कुल चायेकेगु सम्भावना मदुगु खँ कनादिल ।
‘स्वास्थ्य मापदण्ड नालाः विद्यार्थीयात ब्वंकेगु अधिकार स्थानीय निकाययात बीवं गुलिखे थासय् स्कुल चायेकेधुंकूगु दुसा गुलिखे थासय् चायेकेगु तयारी जुयाच्वंगु दु । तर स्वनिगः थेंज्याःगु जनघनत्व अप्वः दुगु थासय् धाःसा थज्याःगु सम्भावना मदु’ वय्कलं धयादिल ।
थौंकन्हय् स्वनिगःया चन्द्रागिरी नगरपालिकाया आपालं स्कुल चालेधुंकूगु दु। चन्द्रागिरी नपाया प्रमुख घनश्याम गिरीं थःगु नगरपालिका दुने आपालं स्कुल चायेधुंकूगु जानकारी ‘नेपालभाषा टाइम्स’ यात बियादिल । तर स्कुल चाःसां पूवंक हे विद्यार्थी तयाः चायेकूगु मखुसें सरकारं निर्धारण याःगु स्वास्थ्य मापदण्ड नालाः जक स्कुल सञ्चालन जुयाच्वंगु खँ वय्कलं कनादिल ।
वय्कलं धयादी, ‘स्कुल पूवंक हे चाःगु मखु, गुलिखे स्कुलय् वालय् स्वंगू क्लास जक जुइ, गुलिखे स्कुलय् छगू क्लास जक जुइ । फुक्कं विद्यार्थीयात छथाय् तयाः नियमित रुपं क्लास कायेगु ज्या धाःसा जुयाच्वंगु मदु ।’
उकथं हे शंखरापुर नगरपालिकाय् नं स्वास्थ्य मापदण्ड नालाः छुं छुं स्कुल चायेकाहःगु खँ अनया मेयर सुवर्ण श्रेष्ठं कनादीगु दु । स्वास्थ्य मापदण्ड पालना यानाः आः तोखा नगरपालिका, तार्केश्वर नगरपालिका, कागेश्वरी मनोहरी नगरपालिका व गोकर्णेश्वर नगरपालिकाय् नं स्कुल चायेकेगु तयारी जुयाच्वंगु खँ सीदुगु दु। अथे खःसां येँ, यल, ख्वप नगरपालिकां धाःसा अझ नं स्कुल चायेकेगु अनुमति बिउगु मदुनि ।
LEAVE YOUR COMMENTS