उदयपुरय् प्रदेशस्तरीय लाखे प्याखं कासा

येँ(नेपालभाषा टाइम्स)- उदयपुरया गाइघाटय् प्रदेशस्तरीय लाखे प्याखं कासा जुल । सदरमुकाम गाइघाटय् न्ह्यानाच्वंगु ‘परिकार मेला तथा लाखे प्याखं कासा–२०७९’या झ्वलय् उगु कासा जूगु खः ।

झीगु नेवाः पुचः त्रियुगा नगर कमिटीया ग्वसालय् न्ह्यानाच्वंगु मेलाया खुन्हुया दिं शनिवाः जूगु लाखे प्याखं कासाय् प्रदेश १ या च्यागू जिल्लाया झिंनिगू पुचलं ब्वति काःगु खः । लाखे प्याखं कासाय् उदयपुरया गाइघाट, कटारी, खोटाङ, ओखलढुंगा, संखुवासभा, इलाम, झापा, मोरङ व सुनसरीया पुचलं ब्वति काःगु खः ।

त्रियुगा नगरपालिका ११ गाइघाट बजाःया मूल सतकय् ग्वसाः ग्वःगु लाखे प्याखय् न्हापयात छगू लख द्वःछिलिसें ट्रफी व दसिपौ, लिउयात न्हय्न्याद्वः व द्वःछि, लियांलिउयात न्यय्छद्वः व छतका व हःपाःयात झिंछद्वः व छतका दांया सिरपाः दुगु ग्वसाः खलःया छ्याञ्जे गोपाल श्रेष्ठं जानकारी बियादीगु दु ।

कासाय् ब्वति काःगु दक्वं पुचःयात सिरपाःया व्यवस्था दुगु नापं सिरपाः व्यक्तिगत प्रयोजनय् व्यवस्था यानागु नं छ्याञ्जे श्रेष्ठं कनादिल । मेला म्हिगः आइतवाः क्वचाःगु खःसा समापन ज्याझ्वलय् कासाय् विजयी जूपिंत सिरपाः नं दसिपौ लःल्हायेगु ज्या जूगु पुचःया नायः ज्ञानेन्द्र श्रेष्ठं जानकारी बियादीगु दु ।

मेलाय् नेवाःनापं किराती, मगः, थारु, दनुवारया परम्परागत नसा त्वँसा ज्वलंया निगू दर्जन स्वयां अप्वः स्टल दुगु खः ।