लिपि, कला, सम्पदायात कयाः सहलह

येँ(नेपालभाषा टाइम्स)- स्वनिगःया स्थानीय सम्पदायात कयाः छगू सहलह जूगु दु । नेवाः गुथि न्यूयोर्क व सेभ नेपाः भ्यालीया मंकाः ग्वसालय् नेवाः कला, संस्कृतिलिसें लिपि व सम्पदाया विषयय् केन्द्रीत जुयाः उगु सहलह याःगु खः ।

वंगु शनिवाः जूगु सहलह ज्याझ्वलय् थौंकन्हय् नेपाः झाया च्वनादीम्ह वल्र्ड नेवाः अर्गनाइजेसन (डब्लएनओ)या केन्द्रीय नायः संयुक्त श्रेष्ठं थनया मौलिकतां जाःगु नेवाःतय् कला, संस्कृतियात प्रविधिया माध्यमं विश्वन्यंकं थ्यंके फइगु विचाः तयादीगु खः । वय्कलं थौंया आधुनिक युगय् कला संस्कृतियात डिजिटल आर्टया माध्यमं विश्वस्तरतकं थ्यंके फइ धयादिल ।

नेपाल लिपि, कला, संस्कृति व सम्पदा ख्यःया विज्ञलिसें थ्व ख्यलय् न्ह्यचिला च्वंपिं अभियन्तातलिसे जूगु सहलह व अन्तक्र्रियाय् वय्कलं नेपाल संवत्या प्रणेता शंखधर साख्वाःया बारे थम्हं दकलय् न्हापां दयेकादीगु ‘द लिजेन्ड अफ शंखधर’या निर्माण क्रमया अनुभव न्यंकादिसें डिजिटल आर्टया सम्भावना बारे कनादीगु खः ।

मिस नेवाः ११३०या उपाधी विजेता नितु डंगोलं थम्हं उपाधी त्याकेत यानागु मेहनत व उपाधी त्याकेधुंकाःया थःत चूलाःगु थीथी अवसरया बारे कनादीगु खः ।

दाफा बाजंलिसें थीथी स्थानीय व अन्तर्राष्ट्रिय बाजनय् तकं दख्खल तयादीम्ह नितिक डंगोलं थम्हं बाजं सयेकागु श्वेत भैरव दाफा खलकय् थम्हं मचांनिसें ज्याथपिंत तकं बाजं सम्बन्धि प्रशिक्षण बियाच्वनागु अनुभव कनादीगु खः ।

ज्याझ्वः संयोजन यानादीम्ह लालिमा श्रेष्ठं ज्याझ्वःया उद्देश्य बारे कनादीगु ज्याझ्वलय् नेवाः गुथि न्यूयोर्कया नायः विजयमान सिंह नेवाः हेल्प लाइनया उद्देश्य बारे कनादीगु खः ।

सम्बन्धित बुखँ

LEAVE YOUR COMMENTS