नेकपा (एस) १६ वडापाखें एसइइ पास जूपिंत हनेज्या

येँ(नेपालभाषा टाइम्स)- नेपाल कम्युनिष्ट पार्टी (एकीकृत समाजवादी) १६ वडा कमिटीं एसइइ उत्तीर्ण वडाया विद्यार्थीतय्त भिंतुना देछासे हनेज्या याःगु दु । पार्टीया १६ वडा कमिटी अध्यक्ष लक्ष्मण गमालया सभापतित्वय् जूगु ज्याझ्वलय् मूपाहांकथं बागमति प्रदेशसभा सदस्य वसन्त मानन्धर झायादीगु खः।

उगु ज्याझ्वलय् २०७९ सालया एसइइ उत्तीर्ण यानादीपिं वडाया सछि व नीम्ह विद्यार्थीयात हनेज्या याःगु खःसा वडा दुने दकलय् अप्वः जीपीए हयादीम्ह प्रतिक्षा प्रजापतियात विशेष सम्मान याःगु खः ।

एसइइ उत्तीर्ण विद्यार्थीतय्त भिंतुना देछासे मूपाहां बागमति प्रदेशसभा सदस्य मानन्धरं विद्यार्थीतय्सं थःगु भविष्यया लँपु थःपिंसं हे क्वःछिमाःगु व उकिया निंतिं ल्वःकथंया विषय ल्ययाः उच्च शिक्षा अध्ययन यायेमाःगु खँय् बः बियादिल । लिसें वय्कलं नेपालय् हे थःगु ज्ञान, सीप व क्षमताया प्रयोग यायेमाःगु नं धयादिल ।

नेकपा (एस)या विद्यार्थी संगठन अखिल नेपाल राष्ट्रिय स्वतन्त्र विद्यार्थी संगठन (समाजवादी)या नेतृ आरती लामां विद्यार्थीतय्के न्ह्यसः न्यनेगु संस्कृतिया विकास जुइमाःगु खँय् बः बियादिल ।

ज्याझ्वलय् पाहांकथं झायादीपिं प्रभादेवी वज्राचार्य व रामेश्वर श्रेष्ठलिसें मेमेपिंसं नं भिंतुनालिसें नुगःखँ तयादीगु खः ।