महानगरया निःशुल्क उपचारया कार्यविधि तयार

येँ(नेपालभाषा टाइम्स)ं- येँ महानगरपालिकां लक्षित वर्गयात उपलब्ध याकीगु निःशुल्क उपचारया कार्यविधि मस्यौदा तयार याःगु दु । येँ महानगरं लक्षित वर्गया निःशुल्क उपचारयात व्यवस्थित, प्रभावकारी व पारदर्शी यायेगु ल्याखं कार्यविधि मस्यौदा तयार याःगु खः ।

महानगर उपप्रमुख सुनिता डंगोलं स्वास्थ्य संस्था सञ्चालन मापदण्ड–२०७७ कथं लक्षित वर्गया निःशुल्क उपचारया निंतिं कुलमध्ये १० प्रतिशत श्यया उपलब्ध याकेगु व्यवस्था कार्यान्वयनया निंतिं विधि, प्रक्रिया व दायित्वयात नं मस्यौदाय् दुथ्याकागु जानकारी बियादीगु दु ।

अस्पतालय् उपचारया निंतिं समन्वय व सहजीकरण यायेत येँ महानगरय् चिकित्सासहितया निःशुल्क उपचार एकाई दइ । एकाईलय् दक्वं अस्पतालय् उपलब्ध निःशुल्क श्ययाया ल्याः उपयोग, ल्वय्कथंया चिकित्सासेवा सम्बन्धी विवरण नं दइ ।

तथ्यांक व सेवाया आधारय् उपचारया निंतिं अस्पताल व ल्वगिया दथुइ समन्वय व सहजीकरण यायेगु एकाईया मुख्य जिम्मेवारी जुइगु उपप्रमुख डंगोलं कनादिल ।

थुुगु प्रक्रियाया निंतिं ल्वगिं वडायात सिफारिसया निंतिं निवेदन बीगु, स्थानीय तहं उपचारया निंतिं सिफारिस यायेगु, वडां हे सर्जमिन यायेगु, ल्वगियात उपचार बीगु इलय् जायेकेमाःगु फाराम, दैनिकी विवरण, रजिष्टर, उपचार सेवा काइम्ह ल्वगि वा वया थःथितिपाखें प्राप्त यायेमाःगु विवरण प्रतिवेदनलिसें मेमेगु आवश्यक प्रक्रियाया निंतिं माःगु ढाँचा अनुसूचिइ दुथ्याकागु नं उपप्रमुख डंगोलं कनादिल ।