अप्वः डाक्टर फेल
७७६ म्हेस्यां जाँच बिउगुली १८९ म्ह जक पास
येँ – डाक्टर जुइगु लागिं नेपाः लगायत विश्वया थीथी देशय् आखः ब्वना वइपिं नेपाःया विद्यार्थीत ज्या सुरु याये न्ह्यः मेडिकल काउन्सिलं काइगु जाँचय् धाःसा यक्व मात्राय् फेल जुयाच्वंगु खँ सीदुगु दु । मेडिकल काउन्सिलं काइगु जाँचय् पास मजूतले उमित डाक्टरी ज्या यायेगु प्रमाणपत्र प्राप्त जुइ मखु ।
थ्व प्रमाणपत्र मदुतले उमिसं डाक्टर हे जुया वनेधुंकूसां विरामी जाँचे धाःसा याये दइ मखु ।वंगु शनिवाः मेडिकल काउन्सिलं काःगु जाँचय् मुक्कं ७७६ म्हेस्यां परीक्षा बिउगु खःसा उकी १८९ म्ह जक पास जूगु खः । काउन्सिल सूत्रं धाःकथं न्हापा थ्व परीक्षाय् विदेशय् एमबीबीएस ब्वना वःपिं विद्यार्थीत जक अप्वः फेल जुइगु खः ।
तर थौंकन्हय् नेपालय् हे ब्वनाः पास याना वःपिं तकं फेल जुइगु मात्रा अप्वया वःगु दु । सन् १९१५ य् थुगु परीक्षाय् ६८ प्रतिशत विद्यार्थी पास जूगु खःसा वयां लिपा हरेक दँय् थ्व प्रतिशत घटे जुजुं वनाः आः ५५ प्रतिशतय् थ्यं वःगु दु । छगू इलय् अथे पास जुइपिनि ल्याः ६७ प्रतिशत तक थ्यनीगु खः ।
मेडिकल काउन्सिलं काइगु थ्व परीक्षाय् छक्वः फेल जुइवं उम्ह विद्यार्थी सदांया लागिं अयोग्य जुइगु धाःसा मखु । वं हरेक स्वला स्वलाय् थ्व परीक्षा बियाच्वने खनी । उकिं न्हापांखुसी फेल जूसां लिपा हानं पास जुइगु सम्भावना दयाच्वनी नेपालय् हे एमबीबीएस पास जूपिं विद्यार्थीत तक मेडिकल काउन्सिलया परीक्षाय् फेल जुयाच्वंगुलिं उकिया लिच्वः तसकं नकारात्मक जुया वनीगु सम्भावना खने दया वःगु खँ धाःगु दु ।
नेपाःया मेडिकल शिक्षा बारे विवाद जुयाच्वंगु हे इलय् मेडिकल काउन्सिलया थ्व लिच्वः पिहां वःगुलिं थुकिं मेगु वहस पिथनीगु अनुमान याना हःगु दु ।
निजी मेडिकल शिक्षाय् न्ह्यसः
मेडिकल काउन्सिलं काइगु परीक्षाय् नेपालय् हे एमबीबीएस ब्वंपिं विद्यार्थीत नं अप्वः फेल जूगुलिं नेपाःया डाक्टरी शिक्षाया गुणस्तर कुहां वंगु दावी याना हःगु दु । नेपालय् यक्व मात्राय् निजी क्षेत्रया मेडिकल कलेजत चायेकाच्वंगु व अनया गुणस्तर बांलाः मजू धकाः न्हापा नं खँ वयाच्वंगु खः ।
गुणस्तर बांलाः मजुइगु कारणं यानाः थन अप्वः निजी मेडिकल कलेज चायेके मजिल धकाः आन्दोलन समेत जुयाच्वंगु खः । मेडिकल काउन्सिलया थ्व नतिजां थ्व बिचाः तइपिंत अझ बल दइगु अनुमान याना हःगु दु ।
LEAVE YOUR COMMENTS