एमालेय् स्थायी समिति खारेज यायेगु प्रस्ताव, आः शक्तिशाली अध्यक्ष प्रणाली

येँ – प्रमुख प्रतिपक्षी नेकपा (एमाले) या सांगठनिक संरचनाय् हिउपाः हइगु जूगु दु । म्हिगः तुलसीलाल प्रतिष्ठायन ज्याकुथी च्वंगु पार्टीया मुँज्यां थज्याःगु निर्णयत याःगु खः । आः वइगु पार्टी अधिवेशनय् थ्व प्रस्तावत पारित यानाः कार्यान्वयन यायेगु एमालेया ग्वसाः दु ।

थ्व कथं आः एमालें पार्टी अध्यक्ष प्रत्यक्ष निर्वाचनपाखें ल्ययेगु न्हूगु प्रस्ताव न्ह्यःने हःगु दु । थथे जुल धाःसा निर्वाचित अध्यक्षयात सुनां नं दथुइ हाथ्या बी मफइगु व अध्यक्षं न्यादँ तक ढुक्क हे जुयाः पार्टी न्ह्याके फइगु खँ धाःगु दु । पार्टीया निर्णय सार्वजनिक यायेत जूगु पत्रकार सम्मेलनय् न्ववासें पार्टी प्रवक्ता प्रदिप ज्ञवालीं धयादिल, ‘न्हापाया प्रावधानय् गबलें गबलें अध्यक्षयात दथुइ हे हाथ्या वयाः पूवंक कार्यकाल चले यायेत थाकुइगु अवस्था वइगु खः, आः न्हूगु अवस्थां अज्याःगु स्थितिया अन्त्य याइ ।’ मेमेगु पदत धाःसा यथावत जुइ ।

आः पार्टीया संरचनाय् थौंकन्हय् केन्द्रीय कमिटी, वयां च्वय् पोलिटब्युरो व वयां नं च्वय् स्थायी समितिया व्यवस्था यानातःगु खःसा आः स्थायी समिति खारेज यानाः केन्द्रीय कमिटी व पोलिटब्युरो जक तयेगु निर्णय नं याःगु दु । पार्टीया न्हियान्हिथंया ज्या यायेत चीधंगु सचिवालय छगू दइ । थ्व ल्याखं न्हापा पार्टी दुने स्वंगू तहया संरचना दुगु खःसा आः निगू जक तकया संरचना दइगु खँ नं प्रवक्ता ज्ञवालीं कनादिल ।

अथे हे आः पार्टीया बैठक आदि च्वनीबलय् राष्ट्रिय ध्वाँय् ब्वयेकेगु लिसें राष्ट्रिय धुन हायेकेगु निर्णय नं बैठकं याःगु दु । पार्टीया बैठकं शेर बहादुर देउवाया सरकारयात धाःसा कडा रुपं आलोचना याःगु दु । वर्तमान सरकारं थःगु ज्याया शुरुवात निर्माणपाखें मखुसें स्यंकेगुपाखें याःगु दु धासें भूमि समस्या समाधान आयोग खारेज यानाः जनताया आवासया हक हनन् याःगु दु धकाः आलोचना याःगु दु । एमालें सरकारयात थ्व आयोग भंग यायेगु निर्णय लित कायेत नं इनाप याःगु दु ।

‘निम्हम्ह अध्यक्ष’ या खँ गनं वल ?
पार्टीया वरिष्ठ नेता माधव नेपाल पुचःलिसे एकता याना वनेगु थःपिनि नीति यथागत दनिसां दथुइ माधव नेपालयात निम्हम्ह अध्यक्ष दयेकेगु धकाः वःगु प्रस्ताव लिपा खँ स्यना वंगु बिचाः एमाले प्रवक्ता प्रदिप ज्ञवालीं तयादिल । माधव नेपालयात पार्टीया निम्हम्ह अध्यक्ष दयेकेगु प्रस्ताव ला केपी ओली पक्षं हे वःगु मखुला धकाः पत्रकारतय्सं न्यंगु न्ह्यसःया लिसलय् ज्ञवालीं धयादिल, ‘न्ह्यागुसां छुं थासं वल का…’

माधव नेपालयात पार्टीया निम्हम्ह अध्यक्ष दयेकेगु प्रस्ताव थःत केपी ओली पक्षं तये हःगु खः धकाः माधव नेपालं बरोबर धायेगु यानाच्वंगु दु । थ्व प्रस्तावयात नेता नेपालं अस्वीकार यानादीगु खः ।

नेपाल पक्षं पार्टी एकताया लागिं पार्टीपाखें लगातार यानाच्वंगु निर्णयत स्थगित या धकाः इनाप याःगु खःसां नं ओली पक्षं धाःसा थःपिनि पक्षया बैठक च्वनाः धमाधम न्हून्हूगु निर्णयत यानाच्वंगु दु ।

सम्बन्धित बुखँ

LEAVE YOUR COMMENTS