
येँ (नेपालभाषा टाइम्स)- नेपाली कांग्रेसया सांसद डा. सुनिल कुमार शर्मां म्हिगः प्रमुख प्रतिपक्षी एमालेया अध्यक्ष केपी शर्मा ओलीयात नापलायेवं राजनीतिइ मेगु कथंया लहर पिहां वःगु दु । शर्मायात वंगु वालय् तिनि नक्कली सर्टिफिकेट केशय् ज्वनाः कुना बिउगु खःसा लिपा अदालतया आदेश कथं त्वःता हःगु खः ।
थःत अदालतं त्वःता हयेधुंकाः शर्मां थःगु हे पार्टीया अध्यक्षयात तकं नाप मलासे एमाले अध्यक्षययात नाप लाःवंगुलिं राजनीतिइ न्हूगु लहर पिहां वःगु खः । सूत्रतय्सं धाःकथं शर्मां सदनय् लुँ काण्डया झ्वलय् गृहमन्त्री व अर्थमन्त्रीं राजीनामा बीमाः धकाः माग यानादीगु खः । वयां लिपा वय्कःयात ज्वंगु खः । तर वय्कःयात त्वःतेगु ज्याया लिउने धाःसा थीथी कथंया चलखेल जूगु अनुमान याना हःगु दु ।
वय्कःया थेंज्याःगु हे केशय् ज्वंपिं मेपिं न्याम्ह डाक्टरयात धाःसा आः तक कुना हे तःगु दनिसा वय्कःयात जक त्वःतेगु आदेश बिउगुलिं उकिया लिउने एमालेया राजनीति दयेमाः धकाः आशंका याना हःगु दु ।
सूत्रया कथं सांसद शर्मा कांग्रेस दुने शेखर कोइराला गुटयाम्ह खः । उकिं वय्कःयात ज्वंकेगु ज्याय् देउवाया समेत साथ दयेमाः धकाः अनुमान याना हःगु दु । वय्कःयात ज्वंगु खँय् देउवां छुं न्वमवाः धकाः कोइराला गुट तच्वयाच्वंगु दु । थौंकन्हय् कांग्रेस दुने कोइराला गुट व सांसद शर्माया लाइन मिले जुयाच्वंगु दु । उकी आः एमालेया नं लाइन मिले जुया वःगु दु ।
सांसद शर्मां म्हिगः वनाः ओलीयात नापलाःगु व वय्कःया लिउने कोइराला गुटया साथ दुगु जुयाः थ्व गनं सत्ता समीकरण हे हिलेत्यंगुया संकेत जकं मखु ला धकाः तकं अनुमान याना हःगु दु । लुँ तस्करीया बारे एमालें धाः थें उच्चस्तरीय छानबिन आयोग गठन मयात धाःसा थम्हं संसद भवनय् हे आमरण अनसन च्वनेगु धयादीगु दु ।
LEAVE YOUR COMMENTS