छठ पुखू दयेकीपिंपाखें विरोध

येँ -थौंकन्हय् विवादय् वयाच्वंगु कमल पुखूयात स्वनिगःया मौलिकतां जाःगु पुखू मखुसें छठ माने यायेगु पुखू दयेकेमाः धाइपिंसं निर्माण ज्याय् अवरोध पिकयाच्वंगु द्वपं येँ मनपाया मेयर विद्यासुन्दर शाक्यं बियादीगु दु ।

पिने जिल्लायापिं छुं मनूतय्सं कमल पुखूयात छठ माने याइपिनि पुखू दयेकेगु कथं याःगु कुतःयात येँ मनपां पना बीवं आः सम्पदा संरक्षणया नामं विरोध शुरु याःगु बिचाः नं मेयर शाक्यं कनादिल ।

सम्पदाप्रेमितय्गु खँ न्यनाः येँ मनपायात पौ छ्वया हःम्ह उगु क्षेत्रया पुलांम्ह सांसद गगन थापायात थःपिंसं नं पौ च्वयाः थापां अन सांसद कोषपाखें छु छु निर्माण यानागु खः उकिया धलः छ्वया हजि धकाः थम्हं नं पौ च्वयागु खँ नं वय्कलं कनादिल । वय्कलं धयादिल, ‘यदि गगन थापां लिसः छ्वया हल धाःसा सी दइ कि कमल पुखुली न्हापा सुनां सिमेन्ट छ्यलाः अन निर्माण याःगु खः । यदि वय्कलं लिसः मबिल धाःसा अन खर्च याना धाःगु ध्यबा ला हिनामिना यानाः फुकूगु धइगु प्रमाणित जुइ ।’

मेयर शाक्यं सम्पदाप्रेमिया ख्वाःपाः पुनाः राजनीति याः वःगु खँय् नं आक्रोश प्वंकादिल । थौंकन्हय् सम्पदाप्रेमि धाल कि न्ह्यागु याःसां जिउ धइथें जुयाच्वंगु दु धासें वय्कलं धयादिल, ‘कमल पुखूया चा ख्वालय् पानाः वालुवाटार घेरे यायेगु ज्या राजनीति खः लाकि मखु ?’

न्हापा रानी पुखू दयेकागु इलय् नं सम्पदाप्रेमि धाःपिंसं थथे हे विरोध याःगु खँ न्ह्यथँसें वय्कलं धयादिल, ‘रानी पुखू दँय् छक्वः जक मखु थ्व ३६५ न्हु हे चायेकेगु ग्वसाः दु, थ्व ज्या पूरा जुयां हे त्वःती ।’

वीर अस्पताल व दरवार स्कूल दयेकूबलय् अनया लागिं आवश्यक निर्माण सामग्री तिंख्यलय् तयेकाबलय् थःत तिंख्यः मिया नल धाइपिं अभियन्तातय्सं थःपिनि छेँ दनाबलय् निर्माण सामग्री गन तयेगु याना धकाः नं मेयर शाक्यं न्ह्यसः तयादिल ।

सम्बन्धित बुखँ

LEAVE YOUR COMMENTS