म्येँ हालामि तुलाधरया न्हूगु म्युजिक भिडियो

येँ(नेपालभाषा टाइम्स)- ज्याथःम्ह म्येँ हालामि जुजुभाई तुलाधरया न्हूगु म्येँ ‘मतिनया संसार’या म्युजिक भिडियो पिहां वःगु दु । थ्व स्वयां न्ह्यः निपु म्येँया म्युजिक भिडियो पिथनादीधुंकूम्ह वय्कःया स्वपुगु म्येँया म्युजिक भिडियो छुं दिं न्ह्यः जक पिहां वःगु खः ।

म्येँ हालामि तुलाधरया न्हूगु म्युजिक भिडियो या निर्देशन व सम्पादन सुरेन्द्र तुलाधरं यानादीगु खः । म्येँ हालामि तुलाधरया थ्व स्वयां न्ह्यः पिहां वःगु म्युजिक भिडियो नं वय्कलं हे निर्देशन यानादीगु खः ।

म्येँ हालामि तुलाधर थम्हं हे च्वयादीगु म्येँया म्युजिक भिडियो वंगु आइतवाः सीटीसी मलय् जूगु छगू ज्याझ्वःया दथुइ पितब्वज्या याःगु खः। उगु म्येँया संगीतकार व संगीत संयोजन विरेनकुमार शाक्यं यानादीगु खः ।

म्येँ हालामि तुलाधर व वय्कःया जहान मंगललक्ष्मी तुलाधरं निर्माण यानादीगु म्युजिक भिडियोय् नेवाः सुपरस्टार भोगेन्द्र मानन्धर, रुपेन श्रेष्ठ, रोजिना सुवालं अभिनय यानादीगु दु । म्युजिक भिडियोया छाँयाकन देवेन्द्र महर्जन व रमेश बोहरां यानादीगु खः ।

ज्याझ्वलय् संकिपा व साहित्य समीक्षक प्रकाश साय्मि, सिने पत्रकार विजयरत्न असंबरे, म्येँ हालामि तुलाधर व निर्देशक तुलाधरं नुगःखँ तयादीगु खः ।

ज्याथगु उमेरय् सांगीतिक ख्यलय् दुहां झायादीम्ह तुलाधरया थ्व स्वयां न्ह्यः ‘लक्का पठ्ठा उमेर’य् व ‘मन त्यासा कायेधुसेंलि’ निपु म्येँया म्युजिक भिडियो पिदनेधुंकूगु दु ।