ने. सं. ११४३ तछलाथ्व त्रयोदशी -

नेवाः एकता दिवसय् ब्वति कायेत आह्वान

येँ (नेपालभाषा टाइम्स) – थुगुसीया नेवाः एकता दिवस यलया खोनाय् न्यायेकीगु जूगु दु। थ्व झ्वलय् नेवाः एकता दिवस हना ग्वसाः खलःपाखें म्हिगः छगू सार्वजनिक अपिल जारी यासें थुगुसी नेवाः आन्दोलनया रूपय् खोनाय् न्यायेकीगु ११ क्वःगु नेवाः एकता दिवसय् ब्वति कायेत सकसितं आह्वान याःगु दु । थुगुसी थ्वहे वइगु पोहेलाथ्व ९ (माघ ९ गते) खोनाया खुदोल बुँ फाँटय् छगू तःजिगु ज्याझ्वः यासें नेवाः एकता दिवस न्यायेकेगु तयारी जुयाच्वंगु दु। वकुन्हु सुथय् ११ बजे अन ज्याझ्वः जुइगु ग्वसाः दु ।

म्हिगः जारी याःगु अपिलय् नेवाः आन्दोलनया मू आज्जु धइगु नेवाः स्वायत्त राज्यया स्थापना हे खः धासें थुकिया लागिं थौंकन्हय् थीथी मुद्दायात कयाः जुयाच्वंगु नेवाः आन्दोलनयात एकीकृत यायेमाःगु खँ दुथ्याकातःगु दु । खोनाय् फास्ट ट्राय्क दयेकेगु नामय् स्थानीय जनतायात विस्थापित यायेगु कुतः याःगुलिं उकिया प्रतिरोध स्वरुप नेवाः एकता दिवस खोनाय् यानाः थौं नेवाःतय्त राज्यपाखें वयाच्वंगु हाथ्या बारे जागरुक यायेगु ताः तयातःगु दु ।

थुगुसी नेवाः देय् दबूया संयोजनय् नेवाः स्वायत्त राज्य मंकाः संघर्ष समितिइ दुथ्याःगु घटकत जानाः थ्व दिवस हनेत्यंगु खः । ज्याझ्वलय्थौं कन्हय्न्ह्या नाच्वंगु थीथी नेवाः आन्दोलनया न्ह्यलुवातय्सं सम्बोधन याइगु ग्वसाः दु । थ्वहे झ्वलय् नेवाः एकता दिवसया हे लसताय् वर्तमान राजनीतिक अवस्था व नेवाः आन्दोलन धइगु विषययात कयाः भर्चुयल न्वचु ज्याझ्वः नं यायेत्यंगु खँ सीदुगु दु । उकी नेवाः न्ह्यलुवातय्सं थौंकन्हय्ब्व लंगु राजनीतिक विकासक्रमं नेवाः आन्दोलनयात छु लिच्वः लाइ धकाः ध्वाथुइकादी ।