ने. सं. ११४४ कौलाथ्व षष्ठी -

देगलय् वनेत पंगुलिं विरोध

येँ (नेपालभाषा टाइम्स)- येँ महा नगरपालिका वडा नं. १६ य् लाःगु बालाजु पार्क दुने स्थानीय जनतां पुजाआजा यायेमाःगु सांस्कृतिक सम्पदात समेत दुथ्याकाः अन सम्बन्धित समुदाययात दुहां वने मबिउगु खँयात कयाः स्थानीय जनतां विरोध याःगु दु । लिसें थुकिया विरुद्ध स्थानीय समुदायं थ्वहे वइगु शनिवाः बालाजु पार्कया मू लुखा न्ह्यःने धर्ना बियाः असन्तोष प्वंकीगु जूगु दु ।

ल्हुतिया थ्व नीनिधाः हितिया क्षेत्र धार्मिक तथा सांस्कृतिक ल्याखं महत्वपूर्ण लागा खःसा थ्व हिन्दू व बौद्ध निगुलिं धर्मावलम्बीतय् आस्थाया केन्द्र खः । थन दुने स्थानीय लागा लिसें थीथी थासय् च्वंपिं मनूतय्सं दँय्दसं पुज्यायेमाःगु धार्मिकस्थलत नं लानाच्वंगु दु । उकिं थ्व थाय् स्थानीय मनूतय् लागिं खुल्ला याना बी माल धकाः स्थानीय मनूतय्सं ताः ई न्ह्यवंनिसें इनाप याना वयाच्वंगु खःसां येँ महानगरपालिकां वास्ता मयाःगुलिं आः ‘(ल्हुति) बालाजु बाइसधारा संरक्षण संघर्ष समिति’ गठन यानाः आन्दोलन यायेत्यंगु खः ।

थन दुने जुइगु थीथी धार्मिक व सांस्कृतिक ज्याखँया लागि स्थानीयतय्सं उपयोग याना वयाच्वंगु शितलामाइया सामुदायिक ट्रष्ट नं अतिक्रमण यासें परापूर्वकालंनिसें अन न्ह्याना वयाच्वंगु धार्मिक व सांस्कृतिक ज्याय् पंगः थना वयाच्वंगु खँ नं संघर्ष समितिं धाःगु दु ।

थःपिनि परम्परा– गत धार्मिक व सांस्कृतिक अभ्यास निर्वाध रुपं याये दइगु मानव अधिकारयात थुकिं कुण्ठित याःगु धासें मनपां दँय्दसं जुइगु ल्हुति पुन्हिया मेलाय् नं स्थानीय जनतायात जानकारी तकं मबिसे कर्मचारीया भरय् आयोजक समिति गठन यानाः नीतिगत भ्रष्टाचार यानाच्वंगु द्वपं नं संघर्ष समितिं बिउगु दु । थुकियात कयाः सलंसः मनूतय् हस्ताक्षर याकाः बुझे यानां नं वास्ता मयाःगु खँ नं धाःगु दु ।

येँ महानगरपालिका धइगु अस्तित्वय् हे मदुनिगु इलंनिसें अन दुने नीनिधाः हिति, शितलामाइ व रत्नचुडेश्वर देगः दुगु खःसा अन वनेगु लागिं न्हापा बिस्कं लुखाया व्यवस्था यानातःगु खः । तर आः उगु लुखा बन्द यानाः पुजा याः वनीपिं मनूतय्त तकं टिकट कयाः पुजा याः वनेमाःगु अवस्था हःगुलिं थुकिं स्थानीय जनताया सांस्कृतिक अधिकार हनन जूगु खँ धाःगु दु । अथे हे पार्क दुने च्वंगु सलंसःदँ पुलांगु पुरातात्विक पुखुलिइ आः सिमेन्ट तयाः निर्माण यानाच्वंगु जुयाः उकियात पनेमाःगु खँ नं धाःगु दु ।

पार्कया लुखा ६ः३० बजे हे बन्द याइगु कारणं सुथय् पिहां वये मफुपिं स्थानीय ज्याथजिथि व मस्त सनिलय्पाखे पार्क वनेगुपाखें बञ्चित जूगु खँ नं धाःगु दु ।