मनपा व सिसडोलवासीया ‘फोहोर वार्ता’ असफल
येँ (नेपालभाषा टाइम्स)÷येँया फोहोर वायेगु यानाच्वंगु सिसडोल ल्याण्डफिल साइटया स्थानीय वासिन्दा व सरकार दथुइ म्हिगः जूगु वार्ता असफल जूगु दु । म्हिगः स्थानीय जनता व सरकारया प्रतिनिधि दथुइ वार्ता जूगु खःसा उगु वार्ता असफल जूगु खँ येँ महानगरपालिका १७ वडाया वडाध्यक्ष लिसें येँ मनपाया प्रवक्ता नविन मानन्धरं ‘नेपालभाषा टाइम्स’ यात कनादिल ।
वय्कःया कथं सिसडोलया स्थानीय वासिन्दाया माग स्थानीय तहं पूवंके मफइगु जुयाः म्हिगःया वार्ता असफल जूगु खः । सिसडोलया स्थानीय वासिन्दां फोहोर वायेगु थाय् स्वयां १ हजारंनिसें १ हजार २ मिटर जःखः तकया जग्गा अधिग्रहण यायेमाः धकाः माग यानाच्वंगु दु । म्हिगः वार्ताया झ्वलय् जग्गा अधिग्रहण यायेत सरकारं बजेटया व्यवस्था मयाःगु खँ वयेवं वार्ता असफल जूगु खः ।
म्हिगः नं सिसडोलया स्थानीय वासिन्दातय्सं लँय् च्वनाः फोहोर ज्वना वःगु येँ मनपाया गाडी पनाबिउगु खः । येँ मनपां धाःसा थ्व स्वयां न्ह्यः जूगु आपालं धइथें माग पूवनेधुंकूगु खँ न्ह्यथँसें आः सिसडोलया स्थानीय वासिन्दां जग्गा अधिग्रहणयात हे मू मुद्दा दयेकाच्वंगुलिं यानाः वार्ता न्ह्यःने वने मफुगु खँ धाःगु दु ।
थ्वहे झ्वलय् न्हापा सहमति जू कथं स्रोतय् हे फोहोर वर्गीकरण यायेगु ज्या मजूगुलिं यानाः नं फोहोर व्यवस्थापनय् समस्या ब्वलंगु खँ स्थानीय वासिन्दां धाःगु दु । न्हापाया सम्झौता कथं ध्वगिगु व ध्वमगिगु फोहोर स्रोतय् हे व्यवस्थापन यायेगु सम्झौता जूगु खः । तर येँ मनपां उकिया पालना मयाःगु द्वपं नं सिसडोलया वासिन्दातय्सं बिउगु दु ।
थ्वहे झ्वलय् स्रोतय् हे फोहोरया वर्गीकरण याये मफुगुया कारण उकिया लागिं आवश्यक थाय्या अभाव जूगुलिं खः धकाः प्रवक्ता मानन्धरं कनादीगु दु । स्रोतय् फोहोर वर्गीकरण याःसां नं वायेगु थाय् छगू हे जूगुलिं स्रोतय् फोहोर वर्गीकरण यायेगु उचित मजूगु खँ कँसें प्रवक्ता मानन्धरं फोहोर वर्गीकरण यायेगु जक समस्या समाधान मखुसें उकियात व्यवस्थापन यायेगु उचित जुइगु खँ धयादीगु दु ।
ल्याण्डफिल साइटय् फोहोर वाके मबिउगुलिं आः छुं ई छेँनं पिने फोहोर मवायेत येँ मनपां इनाप याःगु दु ।
LEAVE YOUR COMMENTS