बझाङय् हानं भुखाय् ब्वयाः खुम्ह घाःपाः

येँ (नेपालभाषा टाइम्स)-बझाङय् भुखाय् ब्वयाः खुम्ह घाःपाः जूगु दु । घाःपाः जूपिं न्याम्ह बझाङयापिं खःसा छम्ह बैतडीयाम्ह खः । घाःपाः जूपिं न्याम्ह मस्त खः । उमिगु अवस्था सामान्य जूगु खँ प्रहरीं धाःगु दु ।

अथे हे भुखाचं आपालं छेँ दुंगु खँ सीदुगु दु । म्हिगः न्हिनय् २ः४० ताः इलय् ५.३ रेक्टर स्केलया भुखाय् ब्वःगु खःसा वयां लिपा ३ः०६ बजे ६.३ स्केलया भुखाय् ब्वःगु खः ।
भुखाय् ब्वयेधुंकाः वंगु सुख्खा चलखं यानाः जयपृथ्वी राजमार्ग अवरुद्ध जूगु दु । जयपृथ्वी नगरपालिकाया माल्लालाग्ना भिरया छुं थासय् चलः वनाः राजमार्ग बन्द जूगु खः । भुखाचं जिल्ला प्रहरी कार्यालयया छेँ नं क्षति जूगु दुसा जिल्लाया आपालं थासय् क्षति जूगु दु । तर मानवीय क्षति धाःसा मजू ।

न्हापांखुसी बझाङया तलकोट केन्द्रविन्दु जुयाः भुखाय् ब्वःगु खःसा वयां लिपा चैनपुर जःखः केन्द्रविन्दु जुयाः भुखाय् ब्वःगु खः । बझाङय् ब्वःगु भुखाय्या लिच्वः येँनिसें भारतया दिल्ली तक लाःगु खः । पटक पटक लिभुखाय् ब्वयाच्वंगुलिं यानाः स्थानीय वासिन्दा छेँय् पिने खुल्ला थासय् च्वनाच्वंगु दुसा छम्ह मिसां अस्पतालया चौरय् मचा बुइकूगु दु । मचा बुइकेत अस्पताल वनाच्वँच्वं हे भुखाय् ब्वयेवं मिसां अस्पतालया चौरय् हे मचा बुइकूगु खः । मचा व मां निम्हेस्यां अवस्था सामान्य जूगु खँ धाःगु दु ।

भुखाचं यानाः सरकारी अस्पतालय् नं क्षति जूगु दुसा गुलिखे स्कुल भवन नं स्यंगु दु । सुदुरपश्चिम प्रदेशय् खुलाया दुने १५ क्वः भुखाय् ब्वःगु खँ राष्ट्रिय भूकम्प मापन केन्द्रं धाःगु दु । म्हिगः भुखाय् ब्वयेधुंकाः चिचीधंगु लिभुखाय् ब्वयाच्वंगु दु ।