इन्जिनियरिङ विद्यार्थीपाखें प्रदर्शन
येँ (नेपालभाषा टाइम्स)- पुल्चोक इन्जिनियरिङ अध्ययन संस्थानया विद्यार्थीतय्सं शुल्क वृद्धिया विरोधय् मार्चपास याःगु दु । म्हिगः विद्यार्थीतय्सं इन्जिनियरिङ क्याम्पसंनिसे येँया फिब्व ख्यलय् तक शुल्क वृद्धिया विरोधय् मार्च पास याःगु खः ।
छुं न्हि न्ह्यवंनिसें इन्जिनियरिङ (बीई) स्नातक तहया शुल्क वृद्धिया विरोधय् अनया विद्यार्थीतय्सं आन्दोलन याना वयाच्वंगु खः । बीईया शुल्क ३ लाख १८ हजारं थकयाः छक्वलं ७ लाख ७७ हजार थ्यंकेवं विद्यार्थीत आन्दोलित जूगु खः । म्हिगःया विरोध प्रदर्शनय् अनेरास्ववियु, नेविसंघ, अलिख क्रान्तिकारी, अनेरास्ववियु लगायत विद्यार्थी संगठनतय्सं नं ब्वति काःगु खः ।
थ्वहे झ्वलय् प्यंगू विद्यार्थी संगठनं इन्जिनियरिङ स्नातक तहया शुल्क थकाःगु खँय् गम्भीर आपत्ति प्वंकूगु दु । प्यंगू विद्यार्थी संगठनं छगू मंकाः विज्ञप्ति जारी यासें आः वइगु नीप्यघौया दुने आः थकाःगु शुल्क खारेज यायेत इनाप याःगु दु । यदि थकाःगु शुल्क नीप्यघौया दुने क्वमकाल धाःसा
कडा संघर्षया ज्याझ्वः यायेगु ख्याच्वः नं बिउगु दु ।
इन्जिनीयरिङ संस्थानं साउन २५ गते कार्यान्वयन समितिया निर्णयं स्नातक तहया शुल्क निदुगं अप्वयेकूगु खः । इन्जिनियरिङ अध्ययन अध्ययन संस्थानं आंगिक क्याम्पसय् निदुगं शुल्क थकायेवं आधारभूत रुपय् जनताया पहुँचय् दुगु इन्जिनियरिङ शिक्षापाखें आर्थिक रुपं विपन्न व जेहेन्दार विद्यार्थीतय्त बञ्चित याइगु खनेदु धासें उकिया विरुद्ध संघर्ष यायेमाःगु खँ धाःगुद ु ।
विज्ञप्तिइ अखिल क्रान्तिकारीया पञ्चा सिंह, अनेरास्ववियया सुदेश पराजुली, अखिल क्रान्तिकारीया प्रकाश शाही व समाजवादी विद्यार्थी युनियनया रमेश यादवं हस्ताक्षर यानातःगु दु ।
LEAVE YOUR COMMENTS