किपुलिइ बाःछियंकंया उद्घोषण तालिम

किपू -किपू नगरपालिकाया ग्वसालय् बाःछियंकंया उद्घोषण तालिम न्ह्याःगु दु । नगरपालिकाया ग्वसालय् उद्यमशीलताया विकास व क्षमता अभिवृद्धिया निंतिं उगु तालिम संचालन याःगु खः ।

किपू नगरपालिकाया प्रमुख रमेश महर्जनं वंगु शनिवाः छगू ज्याझ्वःया दथुइ वडा नं. ५ पांगा, दथलय् च्वंगु महिला सुरक्षित भवनय् जूगु तालिमया उलेज्या यानादीगु खः । तालिम उलेज्याझ्वलय् नगर प्रमुख महर्जनलिसें उपप्रमुख सरस्वती खड्कां तालिम व उकिया महत्वया थीथी पक्षयात कयाः थःथःगु नुगःखँ तयादीगु खः ।

किनपा ५या वडाअध्यक्ष राजेन्द्रकुमार महर्जनं तालिम कयादीपिं प्रशिक्षार्थीतय्त थःपिंसं सयेकागु तालिम लिप वनाः वडाया थीथी ज्याझ्वलय् सदुपयोग जुइकथं ग्वाहालि यायेत इनाप यानादिल ।

तालिमया प्रशिक्षक सुनिता डंगोलं प्रशिक्षार्थीतय्सं तालिमय् ध्यान बीमाःगु थीथी पक्षयात कयाः कुलादीगु खःसा किपू नगरपालिका उद्यमशील विकास सहजकर्ता बबिता केसीं नं नुगःखँ तयादीगु खः ।