येँ १७ वडाय् आइसोलेसन वार्ड

येँ- येँ महानगरपालिका वडा नं. १७ स्थित धल्को त्वालय् आइसोलेसन सेन्टर स्थापना याःगु दु । छत्रपातिं धल्को वनेगु लँय् च्वंगु गोर्खा अस्पतालय् आइसोलेसन वार्ड संचालन याःगु खः ।

नेपाली कांग्रेसया नेतालिसें पुलांम्ह उपप्रधानमन्त्री प्रकाशमान सिंहं छुं दिं न्ह्यः जक उगु आइसोलेसन सेन्टरया उलेज्या यानादीगु खः । येँ महानगरपालिका १७ वडाया सक्रियताय् ३० गू बेडया आइसोलेन सेन्टर संचालनय् हःगु खः ।

येँ मनपा १७ वडाअध्यक्ष नवीन मानन्धरं बियादीगु जानकारीकथं नेपाल उद्योग वाणिज्य महासंघया आर्थिक ग्वाहालिइ उगु आइसोलेसन सेन्टर संचालनय् हःगु खः । आइसोलेसनया निंतिं प्यम्ह चिकित्सक, झिंनिम्ह नर्स व व्यवस्थापन स्वयेत च्याम्हेसिया जनशक्तिया व्यवस्था यानातःगु दुसा इमित नयेगु व वासःया निंतिं माःगु सकतां खर्च महासंघं हे याइगु जानकारी वडाअध्यक्ष मानन्धरं बियादीगु दु ।

कोरोना संक्रमित जूपिं छेँय् च्वनेत थाय् मदु, ततःधंगु बांलाःगु अस्पतालय् तसकं हे थिकेक ध्यबा पुलेमाः, चिचिधंगु अस्पतालय् थाय् मदु थज्याःगु अवस्थाय् थःगु हे वडा दुने च्वंगु पुलांगु गोर्खा अस्पतालयात आइसेलेसन सेन्टर संचालन यानागु नं वय्कलं कनादिल ।

थुगु आइसोलेसन सेन्टरय् च्वनीपिंत नयेगु, वासः व मेमेगु सकतां निःशुल्क हे जुइगु नं वडाअध्यक्ष मानन्धरं कनादिल ।

 

सम्बन्धित बुखँ

LEAVE YOUR COMMENTS