समाजवादी मोर्चां छगू हे चिं व ध्वाँय् ज्वनाः चुनाव ल्वाइगु

येँ (नेपालभाषा टाइम्स)-सत्तारुढ दल माओवादी केन्द्र समेत जानाः छुं ई न्ह्यः गठन याःगु समाजवादी मोर्चां आः चुनाव नं नापं ल्वायेगु कथंया रणनीति दयेकूगु खँ सीदुगु दु । आः जुइगु संसदीय चुनावय् थ्व मोर्चां छगू हे चुनाव चिं व छगू हे ध्वाँय् च्वनाः चुनाव ल्वायेगु कथंया रणनीति दयेकाच्वंगु खँ धाःगु दु ।

समाजवादी मोर्चां छुं ई न्ह्यः तिनि छगू हे अवधारणा दयेकाः उकी आवद्धपिं नेत्र विक्रम चन्द विप्लवया पार्टी, जनता समाजवादी पार्टी, माओवादी केन्द्र व नेकपा (एकीकृत समाजवादी) जानाः समाजवादी मोर्चा गठन याःगु खः । उगु मोर्चाया अवधारणापत्र तयार यानादीम्ह जसपाया नेता राजेन्द्र श्रेष्ठं कनादी कथं आः चुनावय् मोर्चा छगू हे चुनाव चिं कयाः ल्वायेगु तकया मनःस्थितिइ दु । उकिया लागिं नं मोर्चाया शीर्ष नेतातय्सं गृहकार्य यानाच्वंगु दु ।

आः चुनाव मत्यःनिगु जुयाः थुकिया बारे खास चर्चा मजूसां लिपा चुनाव त्ययेकाः थ्व गृहकार्य अझ न्ह्याः वनीगु खँ नं वय्कलं कनादिल ।
आःयात माक्र्सवादयात विश्वास याइगु प्यंगू समाजवादी पार्टीत जानाः थ्व मोर्चा गठन याःगु खःसा थुमिसं राजनीतिक अवधारणाय् मंकाः सहमति याये धुंकूगु दु ।

आः चुनाव जुइबलय् चुनावी घोषणापत्र नं छगू हे जक दयेकीसा चुनाव चिं नं छगू हे जक काइ । छु चिं काइ धइगु खँ धाःसा क्वःमछिउनि । सम्भवतः चुनावया लागिं तारा (नगु) चिं काये फइगु खँ धाःगु दु । लिसें चुनावया लागिं मोर्चाया ध्वाँय् नं मंकाः कथं छगू हे दयेकेगु ज्या जुइ धाःगु दु ।

बाबुरामया मेगु हे मोर्चा
माओवादी केन्द्र समेत जानाः गठन याःगु समाज–वादी मोर्चाय् डा. बाबुराम भट्टराई दुथ्याये मफयेवं आः डा. भट्टराईया पार्टी नेपाल समाजवादी पार्टीं हानं मेगु मोर्चा दयेकीगु जूगु दु । नेसपां म्हिगः पित बिउगु वक्तव्यय् धयातःकथं आः पार्टीया बिचाः लिसे मिले जूगु पार्टीत जानाः मेगु हे मोर्चा गठन यायेगु निर्णय जूगु दु । थुकिया लागिं आवंनिसें हे अभियान सञ्चालन यायेगु धकाः नं निर्णय याःगु दु ।

आः वइगु पुस महिना तक सञ्चालन जुइगु थ्व अभियानं अग्रगामी शक्तिया बृहत् ध्रुवीकरण यानाः देशय् न्हूगु वैकल्पिक शक्ति निर्माण यायेगु लक्ष्य तःगु दु । थुकिया लागिं बिचाः मिले जूगु पार्टी वा पुचःलिसे संवाद यायेगु खँ धाःगु दु ।

सम्बन्धित बुखँ

LEAVE YOUR COMMENTS