सुरक्षा कोषय् दर्ता जूपिं कम

सरकारं तामझामपूर्वक घोषणा याःगु ज्याझ्वः निष्प्रभावी

येँ  – सरकारं अतिकं तामझामपूर्वक घोषणा याःगु सामाजिक सुरक्षा कोष तामझाम जू थें आः तक सफल मजुयाच्वंगु खँ सीदुगु दु । सरकारं देय्या सम्पूर्ण सञ्चार माध्यमयात प्रयोेग यानाः थुकिया प्रचार याःगु खःसां आः तक थुकी दर्ता जुइत जम्मा १७०० म्ह जक ज्यामित वःगु खँ कोषपाखें सीदुगु दु ।

सामाजिक सुरक्षा कोषयात सरकारं ‘न्हूगु युगया शुरुवात’ धकाः प्रचार याःगु खः । तर तसकं झःझः धायेक प्रचार याःसां उकी आशा यानातः थें आः तक नं मनूतय्सं सहभागिता मक्यंगु खनाः धाःसा कोषया पदाधिकारीत अजूचाःगु खँ सूत्रं धाःगु दु । आः तक कोषय् दर्ता जू वःपिं नं खास यानाः तःधंगु व्यापारिक घरानियाँतपाखें सञ्चालित कम्पनीया कर्मचारी, हाइड्रोपावर कम्पनीया कर्मचारी व छुं सहकारीइ ज्या याइपिं कर्मचारीत जक वःगु दु ।

लिसें छुं भचा शिक्षकत नं वःगु दुसां निजी क्षेत्रपाखें सञ्चालित स्कूलत धाःसा अझं मवःनिगु खँ नं धाःगु दु । थ्व सुरक्षा कोषय् म्होतिं नं स्वंगू लाख ज्यामित सहभागी जुइगु आशा सरकारं याःगु खः । तर कोष घोषणा जूगु निला दयेधुंकलं नं मुक्कं १७०० म्ह जक वःगुलिं थ्व कार्यक्रमप्रति जनताया रूची मदुगु खः वा थुकिया बारे जनतां मथूगु खः धइगु न्ह्यसः पिहां वःगु दु ।

छुं नं सरकारी निकायय् दर्ता जूगु छुं नं संस्थाय् ज्या याइपिं ज्यामितय्गु तलबय् छुं प्रतिशत कटे यानाः उकी मालिकं मेगु दोब्बर प्रतिशत थपे यासें थुगु कोषय् दाखिला यायेमाःगु व्यवस्था थुकी यानातःगु खः । थ्व ध्यबा ज्यामिया खाताय् सञ्चय कोष थें मुनाच्वनी । लिपा ज्या त्वःतेधुंकाः थ्व ध्यबा लिकाये दइ । तर थौंकन्हय् छुं नं कम्पनीं बांलाक तलब तकं बी मफया–च्वंगु अवस्थाय् थ्व कोषय् ध्यबा दाखिला याये फइगु स्थिति मदयाः नं थुकी सर्वसाधारण जनताया रूची मदयाच्वंगु खँ धाःगु दु ।

परिचयपत्रय् नेपाल संवत् तयेत माग
येँ  – राष्ट्रिय परिचय पत्र व पञ्जीकरण सम्बन्धय् व्यवस्था यायेत दयेकूगु विधेयकय् विक्रम संवत् इश्वी संवतया लिसें नेपाल संवत् नं दुथ्याकेमाःगु माग जूगु दु । सांसद दिव्यमणि राजभण्डारीं उगु माग यानादीगु खः । राज्य व्यवस्था तथा सुशासन समितिया बैठकय् सांसद राजभण्डारीं उगु माग यानादीगु खः ।

अथे हे म्हिगःया बैठकय् सांसदतय्सं परिचय पत्र अध्ययन याये फइगु प्रविधिया विकास मयासे विनियोजन याःगु ७ अर्ब ५२ करोड तका सितिं वनीगु जूगुलिं राष्ट्रिय परिचय पत्र दयेके न्ह्यः अज्याःगु प्रविधिया विकास यायेत नं माग याःगु दु ।

सांसद प्रेम सुवालं परिचय पत्रया आधारभूमि तयार मयासे विधेयक पारित यात धाःसा उकिं ज्या मजुसे बजेट जक फुइगु दावी यानादिल । सांसदतय्सं परिचय पत्र सफल जूगु देय् कम्बोडिया व मलेसियाया नं अध्ययन यानाः न्ह्याः वनेमाःगु खँय् बः बिउगु दु ।

सम्बन्धित बुखँ

LEAVE YOUR COMMENTS