स्वंगू दर्जन जिल्ला ज्याकू खारेज

येँ – येँय् च्वंगु स्वंगू दर्जन सरकारी जिल्ला ज्याकू खारेज जूगु दु । देय् न्हूगु संरचनाकथं संघीय व्यवस्थाय् वनेधुंकाः जिल्ला तहय् दुगु ज्याकू स्थानीय तहया अधिकारय् वनेवं लिपांगु इलय् ३६ गू जिल्ला ज्याकू खारेज जूगु खः ।

येँ जिल्लाया सहायक प्रमुख जिल्ला अधिकारी वासुदेव घिमिरे कनादीकथं जिल्ला प्रशासन, जिल्ला अदालत, सरकारी वकिलया ज्याकू, नापी तथा मालपोत, कोष तथा लेखा नियन्त्रण ज्याकू, जिल्ला निर्वाचन ज्याकू बाहेकया ज्याकूत खारेज जूगु खः ।

जिल्ला ज्याकू खारेज जुइवं आः संविधानकथं खारेज जूगु ज्याकुथिं याना वयाच्वंगु दक्वं ज्या स्थानीय तहं याइगु जूगु दु । देय् संघीयताय् वनेधुंकाः संविधान कथं वंगु साउन १ गतेनिसें लागू जुइकथं संघीय मामिला तथा सामान्य प्रशासन मन्त्रालयं स्थानीय तहं स्वयेगु कथं जिल्ला ज्याकू खारेज याःगु खः ।

जिल्ला ज्याकू खारेज जुइवं अज्याःगु ज्याकूया दक्वं भौतिक संरचना व कर्मचारी व्यवस्थापन यायेगु ज्या असोज मसान्ततकया दुने क्वचायेकेगु तयारी जुयाच्वंगु दु ।