ससफो–नयाँ शक्ति कन्हय् एकता घोषणा

येँ – संघीय समाजवादी फोरम व नयाँ शक्ति दथुइ कन्हय् पार्टी एकता घोषणा जुइत्यंगु दु । म्हिगः ससफोया सहअध्यक्ष राजेन्द्र श्रेष्ठं निगू पार्टी दथुइ एकता यायेगु सम्झौता जूगु खँ ‘नेपालभाषा टाइम्स’ यात कनादीगु दु । सम्झौता पतिइ ससफोपाखें अध्यक्ष उपेन्द्र यादव र नयाँ शक्तिपाखें डा. बाबुराम भट्टराईनं हस्ताक्षर यानादीगु खः ।

निगुलिं पार्टी दथुइ ताःइलंनिसें एकताया कुतः जुयाच्वंगु खः । वंगु लछि न्ह्यवंनिसें जूगु घनीभूत सहलह लिपा पार्टी एकीकरण जूगु खः ।
वंगु स्थानीय चुनाव न्ह्यः नं पार्टी एकीकरणया लिपांगु चरणय् थ्यंगु खःसां नेतातय् दथुइ खँ मिले मजूगुलिं एकता जुइ मफुगु खः । अय्नं तत्कालीन इलय् नयाँ शक्तिया उम्मेदवारपिंसं ससफोया चुनाव चिं कयाः चुनावय् उम्मेदवारी बिउगु खः ।

कन्हय् थनया नेपाल प्रज्ञा प्रतिष्ठानय् छगू तःजिगु ज्याझ्वः यानाः एकता घोषणा यायेत्यंगु दु । पार्टीया नां ‘समाजवादी पार्टी नेपाल’ तयेगु सहमति जूगु दु। सहमति पतिइ संघीय लोकतान्त्रिक गणतन्त्रयात संस्थागत यानाः नेपाःया समाजय् विद्यमान जातीय, वर्गीय, लैङ्गिक व क्षेत्रीय असमानता, विभेद व शोषण अन्त्य यानाः संघीय लोकतान्त्रिक गणतान्त्रिक नेपाःया समृद्धिया निंतिं भूमिका म्हितेगु खँ न्ह्यथनातःगु दु ।

पार्टी एकीकरण लिपा निगुलिं पार्टीया निम्हं अध्यक्ष जुइगु खँय् नं सहमति जूगु दु । संघीय परि–षदया अध्यक्षता डा. बाबुराम भट्टराईनं याइसा केन्द्रीय समितिया अध्यक्षता यादवं याइगु सहमति जूगु दु । पार्टीइ फोरमपाखें झिंखुम्ह व नयाँ शक्तिपाखें गुम्ह पदाधिकारी च्वनी । थुकी ससफोया वरिष्ठ नेता अशोक राईयात गनं थाय् बियातःगु मदु ।

न्हापा नयाँ शक्ति पार्टीं ससफोयात सरकार त्वःतेमाःगु माग याना वयाच्वंगु खःसा न्हूगु सहमति कथं संविधान संशोधनया निंतिं सरकारयात अल्टिमेटम बीगु व उकी सरकारं संविधान संशोधन मयात धाःसा समर्थन लित कयाः सरकार त्वःतेगु सहमति जूगु दु । पार्टी एकीकरणया सम्झौता पतिइ हस्ताक्षर यायेधुंकाः निगुलिं पार्टीया केन्द्रीय समितिया बिस्कं बिस्कं बैठक च्वंगु खः ।

सम्बन्धित बुखँ

LEAVE YOUR COMMENTS