खादा निषेध याःम्ह अध्यक्षया राजीनामा माग

येँ – छुं ई न्ह्यः छगू सुचं हे पिकासें थःगु वडाय् खादाया प्रयोग याये दइ मखु धकाः प्रतिबन्ध तःम्ह सुनकोशी गाउँपालिका वडा नं. १ या वडा अध्यक्ष नेत्रबहादुर कार्कीया राजीनामा माग जूगु दु । पवित्र धार्मिक वस्तु खादायात प्रतिबन्ध तल धासें थीथी आदिवासी जनजाति संगठनतय्सं वय्कःया राजीनामा माग याःगु खः ।

नेपाल तामाङ घेदुङ ३ नं. प्रदेश समिति, आदिवासी जनजाति महासंघ, नेपाल तामाङ घेदुङ, नेपाल शेर्पा संघ, जिरेल संघ नेपाल, तमु ह्युल छौंज धिं गुरुङ राष्ट्रिय परिषद्, ह्योल्मो सेवा समाज, नेपाल थामी समाज, नेपाल माझी उत्थान संघ, दनुवार जागरण समिति, नेपाल मगर संघ व योल्मो काग्र्यु साङ्ङाग लाछोग लगायत १२ गू आदिवासी जनजाति पुचलं छगू विज्ञप्ती जारी यासें थ्व माग याःगु खः ।

वडा अध्यक्ष कार्कीं वंगु असोज ९ गते छगू सुचं पिकासें कातिक १ गतेनिसें थःगु वडा लागाय् जुइगु छुं नं सार्वजनिक ज्याझ्वलय् खादा प्रयोग याये मदइगु खँ धाःगु खः । खादाया थ्व प्रतिबन्ध देय्या कानून व संविधान अःखः खः धासें जनजाति संस्थातय्सं यदि उम्ह वडाध्यक्षं राजीनामा मबिल धाःसा उकिं पिकाइगु छुं नं कथंया लिच्वःया जिम्मेवार व थःहे जुइगु ख्याच्वः नं बिउगु दु ।