ने. सं. ११४४ कौलाथ्व पारू - नःलास्वनेगु

ख्वनाय् न्हयद्वः मनूयात देय् भ्वय्

यल (नेपालभाषा टाइम्स)थनया ऐतिहासिक, सांस्कृतिक व मौलिक नेवाः परम्परा दुगु वस्ती ख्वनाय् वंगु आइतवाः छगू तःजिगु देय् भ्वय्या ग्वसाः ग्वःगु दु । ख्वनाया ऐतिहासिक व सांस्कृतिक रुद्रायणी देवीया देवगणय् दुहां वःपिं न्हूपिं च्याम्ह देवगणया लसकुस व सम्मानय् उगु देय् भ्वय् जूगु खः ।

रुद्रायणी देवीया देवगणय् ताःई न्ह्यवंनिसें प्वनाच्वंगु च्याम्ह गणया रुपय् न्हूपिं ल्याय्म्हत दुहां वःगु लसताय् ख्वनाय् उत्सव हनेकथं उगु देय् भ्वय् न्यायेकूगु खः । थनया रुद्रायणी द्यःया गंप्याखनय् ४६ म्ह दइ । थुपिं पीखुम्ह देवगण मदयेकं प्याखं पूवंकेगु ला छु संचालन तकं याये फइगु सम्भावना मदु ।

ख्वना देय्या धर्म व संस्कृतिया जीवन्तताया निंतिं प्राण वायु सरह जुयाच्वंगु गंप्याखं मुख्य यानाः रुद्रायणी व सिकाली जात्रा खःसा थ्वलिेसें मेमेगु नं जात्रात जुइ । तर थुपिं जात्राय् दक्वं देवगण मदयेकं संचालन यायेगु सम्भव मदु । ताःई निसें प्वनाच्वंगु गंप्याखनय् लिपांगु इलय् पेशागत रुपं इन्जिनियर, कम्प्युटर इन्जिनियरय् संलग्न व उच्च शिक्षा हासिल यानातःपिं च्याम्ह ल्याय्म्हत धार्मिक, सांस्कृतिक, परम्परागत नीति, नियम, विधि व्यवहार पालना यासें गंप्याखनय् दुहां वःगु खः ।

थुकथं रुद्रायणी गंप्याखनय् दुहां वःपिं १८ दँनिसें ४८ दँ दुपिं आर्यन महर्जन, नारायण महर्जन, देवलाल महर्जन, गोविन्द महर्जन, किशोर महर्जन, केशराम महर्जन, दिवाकर महर्जन, बुद्धिरत्न डंगोल खः । वय्कःपिं सकलें गंप्याखनय् दुहां वःगु लसताय् वय्कःपिनिगु हे सम्मानय् वंगु आइतवाः देय् भ्वय्या ग्वसाः ग्वःगु खः ।

यल महानगरपालिका वडा नं. २१या संयोजनय् देवगणया सम्मान व धार्मिक विधिकथं सगं बीगु ज्याझ्वःलिसें देय् भ्वय्या ग्वसाः ग्वःगु खः । मुक्कं ख्वनामित हे जानाः ग्वसाः ग्वयाः व्यवस्थापन याःगु देय् भ्वजय् न्हय्द्वःयात भ्वय् नकूगु खः ।

ज्याझ्वलय् झायादीम्ह उपप्रधानमन्त्री लिसें गृहमन्त्री नारायणकाजी श्रेष्ठं संस्कार, संस्कृति, पहिचानया संरक्षणय् सक्रिय जुयादीपिं देवगणयात थुकथंया औपचारिकताय् जक सीमित जुइगु सम्मान मयासे प्रोत्साहन नं बीमाःगु व उकिया निंतिं विशेष व्यवस्था यायेमाः धयादिल । आधुनिकीकरणय् वनेगु पहिचान त्वःताः यान्त्रिकीकरणया नक्कल यायेगु मखु धासें उपप्रधानमन्त्री श्रेष्ठं आधुनिकताया नामय् भद्दा जुइक नक्कल यायेगु प्रवृत्ति अप्वयाच्वंगु खँय् सचेत जुइमाः धयादिल ।

ख्वनाया संस्कृति, परम्परा ल्यंका तयेत देवगणलिसें न्हू पुस्ताया योगदान महत्वपूर्ण जू धासें वय्कःपिनिगु योगदानया कदर यासे संघ, प्रदेश व स्थानीय सरकारं देवगणयात प्रोत्साहित यायेकथं विशेष योजना हयेमाःगु वय्कःया धापू दु । ‘आधुनिक संस्कृतिया नामय् नक्कल यायेगु प्रवृत्ति अप्वया वन धाःसा उकिं संस्कृतिइ विकृति हइगु जक मखसे बुलुहुं थःगु भाषा, कला, संस्कार, संस्कृति नं तनावनीगु व थःगु म्हसीका हे छखे लाइ धइगु खँय् सचेत जुइमाः’ मन्त्री श्रेष्ठं धयादिल ।

झीगु म्हसीका व झीगु संस्कार, संस्कृति ल्यंका तयेत झी थः हे जायेमाः, मेपिंसं सुनानं याइ मखु धासें ख्वनामितय्सं थःगु संस्कार, संस्कृति, म्हसीका ल्यंका तयेत यानादीगु योगदानया सम्मान नं याना धयादिल ।

पुलांम्ह मन्त्रीलिसें नेकपा माओवादी केन्द्रया नेत्री पम्फा भुसालं ख्वना देय्यात सांस्कृतिक पर्यटकीय क्षेत्रया रुपय् विकास यानाः समुन्नत व समृद्ध ख्वनाया रुपय् न्ह्यःने यंकेगु स्वयेमाः धयादिल । वय्कलं बहुचर्चित फास्ट ट्रायकया योजना ख्वनाया मौलिक वस्तीयात लिच्वः मलाइकथं न्ह्यःने यंकेमाः धयादिल ।

यल महानगर प्रमुख चिरिबाबु महर्जनं यल महानगरया मूर्त अमूर्त सम्पदा, संस्कृति ल्यंका तयेत नापं उकिया संरक्षण, संवद्र्धन यायेत महानगरं महत्वपूर्ण ज्या यानाच्वंगु दु धयादिल । महानगर प्रमुख महर्जनं कला, संस्कृति, पहिचान ल्यंका तयेत ख्वनाय् च्वंपिं दाजुकिजापिंसं यानाच्वंगु ज्यायात कयाः सुभाय् देछानादिल ।

ज्याझ्वःया सभापतिलिसें २१ वडाअध्यक्ष रविन्द्र महर्जनं द्यःगंया निंतिं च्याम्ह थप जूसां अझं मेपिं स्वम्ह देवगणया व्यवस्थापन याये ल्यं दुगु जानकारी बियादिल ।