केन्द्रीय विभागया ई लाइब्रेरी उलेज्या

यल (नेपालभाषा टाइम्स)- नेपालभाषा केन्द्रीय विभागया ई लाइब्रेरी संचालनय् वःगु दु । बिहिवाः छगू ज्याझ्वःया दथुइ येँ महानगरपालिकाया उपप्रमुख सुनिता डंगोलं लाइब्रेरीया उलेज्या यानादीगु खः । ज्याझ्वलय् न्ववानादिसें उपप्रमुख डंगोलं नेपाःया भाषा, कला, साहित्य, संस्कृति सम्बन्धी सफूत विश्वब्यापीकरण यायेत केन्द्रीय विभागया ई लाइब्रेरीं ग्वाहालि याइगु खँ धयादिल ।

‘थौंया नीछगूगु शताब्दीया विकसित प्रविधिया ग्वाहालिं झीसं संसारन्यंकंया विषयवस्तु विश्वया न्ह्यागु थासय् च्वनाः नं तुरुन्त स्वयेफु, सीकेफु । उकिं झीगु नेपाःया बारे च्वयातःगु सामग्री नं अध्ययन अनुसन्धान जुइगु कथं विश्वब्यापीकरण जुइकथं त्रिवि नेपालभाषा केन्द्रीय विभागं चायेकूगु ई लाइब्रेरीया निंतिं येँ महानगरपालिकां नं सहकार्य यायेदयाः तसकं लय्ताः वः ।’

ई लाइब्रेरीया निंतिं येँ महानगरपालिकां ५० लाख तका ग्वाहालि बिउगु खः । आः थुकियात थप परिष्टकृत यायेत महानगरपालिकां थप बजेट बीगु खँ नं वय्कलं धयादीगु दु ।
ज्याझ्वलय् न्ववानादिसें विभागया प्रमुख सहप्राध्यापक डा. राजनलाल जोशीं आः थ्यंमथ्यं प्यद्वः सफू इलाइब्रेरीइ अपलोड जुइधुंकूगु खँ न्ह्यथँसें थुकी नेपालभाषा लिसें नेपाःया कला, साहित्य, संस्कृति सम्बन्धी च्वयातःगु सफू, पुलांपुलांगु थ्यासफू अपलोड यानावनेगु लक्ष्य दुगु खँ कनादिल ।

ज्याझ्वलय् उपप्राध्यापक डा. वज्रमुनि वज्राचार्य, पाटन संयुक्त क्याम्पसया प्रमुख डा. लक्ष्मण वीर सिंह कुवँर, रत्नराज्यलक्ष्मी क्याम्पसया प्रमुख प्रा. डा. जीवनधर ज्ञवाली, नेवाः देय् दबूया अध्यक्ष पवित्र बज्राचार्य, नेपालभाषा केन्द्रीय विभागया विद्यार्थी संगठन लुमन्ति दबूका अध्यक्ष रामेश्वर श्रेष्ठपिंसं थःथःगु नुगःखँ तयादीगु खः । थ्वहे ज्याझ्वलय् पुष्पदेवी छात्रवृत्ति, खैगुलि छात्रवृत्ति, योगवीर सिंह विद्वत्वृत्ति लगायतका छात्रवृत्ति नं लःल्हाःगु खः ।

अथेहे नेपालभाषा स्नातकोत्तर विषयय् उत्कृष्ट ल्याः हःपिं विद्यार्थी, उत्कृष्ट अनुसन्धान लगायतयात सत्यहिरा पुरस्कार, पियूष पदक, श्रेष्ठ पदक लःल्हाःगु खःसा ई लाइब्ररीइ दयेकेत आर्थिक, भौतिक र थीथी कथं ग्वाहालि यानाच्वंपिंत नं सम्मान याःगु खः ।