राष्ट्रपतिया पलाः पना बिल
येँ (नेपालभाषा टाइम्स)- राष्ट्रपति पाखें प्रमाणीकरण जूगु नागरिकता विधेयक कार्यान्वयन मयायेत सर्वोच्च अदालतं अन्तरिम आदेश बिउगु दु । सर्वोच्चया न्यायाधीश मनोज शर्माया एकल इजलासं थुकी अल्पकालीन आदेश बिउगु खः ।
राष्ट्रपति पौडेलं गैरसंवैधानिक ढंगं नागरिकता विधेयक प्रमाणीकरण याःगु धासें वरिष्ठ अधिवक्ता सुरेन्द्र भण्डारी व बालकृष्ण नेउपानें रिट तःगु खः । उगु रिटय् म्हिगः सुनुवाइ यासें सर्वोच्चं अल्पकालीन अन्तरिम आदेश जारी याःगु खःसा अन्तरिम आदेशया निंतिं निगुलिं पक्षयात सःतूगु दु ।
थ्वहे झ्वलय् नागरिकता विधेयकयात कयाः प्रमुख प्रतिपक्षी नेकपा एमाले, रास्वपा व राप्रपां म्हिगः संसद अवरुद्ध याःगु दु । म्हिगः एमाले लगायत पार्टीतय्सं राष्ट्रियसभा व प्रतिनिधिसभा पंगः थनेवं निगुलिं सभाया बैठक थौं तकया नितिं स्थगित जूगु दु ।
म्हिगः संसदया बैठक न्ह्यायेवं एमाले, रास्वपा व राप्रपाया सांसदतय्सं विरोध शुरु याःगु खः । सभामुख देवराज घिमिरें ई बीधुंकाः एमालेया प्रमुख सचेतक पदम गिरीं निष्क्रिय जुइधुंकूगु विधेयकयात असंवैधानिक कथं प्रमाणीकरण याःगु धासें आपत्ति प्वंकूगु खः । गिरी राष्ट्रपतिं प्रमाणीकरण याःगु विधेयकयात निष्क्रिय यानाः संसदय् न्हूगु विधेयक हयेमाःगु माग याःगु खः ।
उकथं हे रास्वपाया प्रमुख सचेतक सन्तोष परियारं नागरिकता विधेयक प्रमाणीकरण गलत जूगु खँ धयादिलसा राप्रपाया अध्यक्ष राजेन्द्र लिङदेनं नागरिकता विधेयक प्रमाणीकरणया विरोध यासें राष्ट्रपति संस्थायात सत्ता स्वार्थया नितिं दुरुपयोगु याःगु द्वपं बियादिल ।
म्हिगः संसद अवरुद्ध यायेगु झ्वलय् एमालेया सचेतक गिरीं प्रधानमन्त्री पुष्पकमल दाहालं भारत भ्रमणया झ्वलय् बंगलादेश फुलवारी बन्दरगाह कायेगु नितिं कालापानी बीत तयार दु धकाः अभिव्यक्ति बिउगु धासें आपत्ति प्वंकुसें उकिया लिसः प्रधानमन्त्री संसदयात बीमाःगु मखुसा संसद चले याके मबीगु ख्याच्वः बिउगु खः ।
LEAVE YOUR COMMENTS