लानिपुखू ग्रन्थकुट शैलीं हे दयेकेत पुरातत्वयात निर्देशन

येँ – संस्कृति, पर्यटन तथा नागरिक उड्डयन मन्त्रालय व राष्ट्रिय पुनःनिर्माण प्राधिकरणं लानि पुखुली च्वंगु बालगोपालेश्वर देगः गुम्बज शैलीं दयेकेगु निर्णययात कयाः पुनः बिचाः यायेत पुरातत्व विभागयात निर्देशन बिउगु दु । संस्कृतिमन्त्री रवीन्द्र अधिकारी, राष्ट्रिय पुनःनिर्माण प्राधिकरणया प्रमुख कार्यकारी अधिकृत सुशील ज्ञवाली, येँ महानगरपालिकाया प्रमुख विद्यासुन्दर शाक्य व पुरातत्व विभागया प्रतिनिधिया उपस्थितिइ म्हिगः च्वंगु बैठकं उगु निर्देशन बिउगु खः ।

बालगोपालेश्वर देगः पुनःनिर्माण सम्बन्धय् पुस १३ गते नीस्वंगु विज्ञ पुचः व पुनःनिर्माण प्राधिकरणं थ्वहे कार्तिक १८ गते नीस्वंगु विज्ञ समितिं ‘बालगोपालेश्वर’ देगः ग्रन्थकुट शैलीं दयेकेगु सुझाव बिउगु खः । बालगोपालेश्वर देगः पुरातत्व विभागं गुम्बज शैलीं पुनः निर्माण यायेगु निर्णय याःगु खःसा विज्ञ पुचलं धाःसा ग्रन्थकुट शैली दयेकेमाःगु सुझाव बिया वयाच्वंगु खः ।

तर उकी विवाद जुया देगः दयेकेगु ज्या दिनाच्वंगु खः । बैठकं लानिपुखुली दुगु ‘जमलेश्वर’ देगः व ‘बिष्णु तीर्थ’ या पुनःनिर्माणय् माःगु समन्वय, सहजीकरण व अनुगमनया निंतिं राष्ट्रिय पुनःनिर्माण प्राधिकरणया संयोजकत्वय् ज्या यायेगु खँ धाःगु दु ।

विज्ञ पुचलं बिउगु सुझाबय् देगःया जीर्णोद्धार यायेबलय् थौंकन्हय् छ्यलाच्वंगु सिमेन्ट कंक्रिटया संरचना चीकाः मल्लकालीन स्वरुप व निर्माण सामग्री छ्यलेत, ग्रन्थकुट शैलीइ दयेकीगु देगःया जग पुलांगु हे सामग्री छ्यलाः दयेकेमाःगु खँ नं धाःगु दु ।