‘कोशी’ बारे बिचाः यायेत नेकांय् सः

येँ (नेपालभाषा टाइम्स)- नेपाली कांग्रेसया झिंप्यम्ह जिल्ला सभापतिं ‘कोशी प्रदेश’या नामय् हाकनं बिचाः यायेत माग याःगु दु । प्रदेशया झिंप्यंगू जिल्लाया सभापतितय्सं मंकाः विज्ञप्ति पिकासें पार्टी नेतृत्व व प्रदेशसभायात थ्व इनाप याःगु खः ।

प्रदेशसभां कोशी नां तयेधुंकाः निरन्तर आन्दोलन जुयाच्वंगु धासें थ्व विरोधया सुनुवाइ कांग्रेसया नेतृत्वं यायेमाःगु खँ नं विज्ञप्तिइ धयातःगु दु ।

विज्ञप्तिइ युवा तथा खेलकुद मन्त्री तकं जुयाच्वंम्ह मोरङ जिल्ला सभापति डिगबहादुर लिम्बु, खोटाङया विष्णु कुमार राई, उदयपुरया हिमाल कार्की, झापाया देउकुमार थेबे, संखुवासभाया दिपक खड्का, सुनसरीया केदार भण्डारी व ओखलढुंगाया तेजेन्द्र खनालं हस्ताक्षर यानातःगु दु ।
उकथं हे सोलुखुम्बुया नामगेल जाङ्बु शेर्पा, तेह्रथुमया अर्जुन तुम्बाहाम्फे, इलामया डम्मर खड्का, पाँचथरया रुपनारायण जगेबु, धनकुटाया दिनेश राई, भोजपुरया

विनोद राई वान्तवा व ताप्लेजुङया गजेन्द्र तुम्याहाङं नं हस्ताक्षर यानातःगु दु । थ्व स्वयां न्ह्यः प्रदेश सभाया नां हिलेमाः धासें माओवादी केन्द्रया प्रदेश समितिं नं माग यायेधुंकूगु दु ।

जसपा पिहां वनेवं प्रदेश १ सरकारय् संकट

प्रदेश नम्बर १ य् जनता समाजवादी पार्टीं सरकार त्वःतेवं एमाले नेतृत्वया सरकार संकटय् लाःगु दु । थुकिं यानाः बजेट दयेकेगु तयारी यानाच्वंम्ह मुख्यमन्त्री हिक्मत कार्कीया सरकार अल्पमतय् लाःगु दु । जसपाया स्वास्थ्यमन्त्री निर्मला लिम्बुं म्हिगः राजीनामा बियाः समर्थन नं लित काःगु खः । जसपां सरकार त्वःतेवं माओवादी केन्द्रयात नं दबाब लाःगु दु । अनया सरकारयात माओवादीं नं समर्थन यानाच्वंगु खः ।

९३ सांसद दुगु प्रदेश नं. १ य् बहुमतया नितिं ४७ मत माः । थन एमालेया ४०, राप्रपाया २, कांग्रेसया २९, माओवादीया ११, नेकपा (एस) या ४ व जसपाया १ म्ह सांसद दु ।