ने. सं. ११४६ बछलागा तृतीया -

रेशम चौधरीयात थौं आम माफी बियाः त्वःतीगु

येँ (नेपालभाषा टाइम्स)- राष्ट्रपति रामचन्द्र पौडेलं रेशम चौधरी लिसें ४८२ म्हेसिया कैद सजाय माफी याःगु दु । नेपाल सरकार मन्त्रिपरिषद्या जेठ १२ व १४ गते च्वंगु बैठकया सिफारिस कथं राष्ट्रपति पौडेलं उगु निर्णय याःगु खः ।

राष्ट्रपति कार्यालयं म्हिगः जारी याःगु विज्ञप्तिइ धयातःगु दु, ‘टोपबहादुर बुढा लिसें झिंखुम्ह मनूतय्त थीथी अदालतं थीथी मितिइ जूगु फैसला कथं फयाच्वंगु कैद सजाय नेपाःया संविधानया धारा २७६ व मुलुकी फौजदारी कार्यविधि संहिता, २०७४ या दफा १५९ कथं गणतन्त्र दिवस, २०८० या उपलक्ष्यय् माफी जूगु दु ।’

थ्वहे झ्वलय् चौधरीयात आममाफी बिउगु धकाः सरकारं याःगु निर्णय विरुद्ध सर्वोच्च अदालतय् रिट दायर जूगु दु । टिकापुर घटनाय् सीम्ह इन्स्पेक्टर केशव बोहराया कला शारदा बोहरा (कडायत) रिट ज्वनाः अदालत वंगु खः । बोहरां रिट सर्वोच्च अदालतं पेश याःगु व अदालत प्रशासनं अध्ययनया झ्वलय् दुगु जानकारी बिउगु दु ।

थ्वहे झ्वलय् बोहरां दायर याःगु रिटयात कयाः सर्वोच्च अदालतं न्हापाया हे नजिरयात कायम याये फइगु सम्भावना दुगु खँ धाःगु दु । पुलांम्ह माओवादी नेता लिसे सांसद बालकृष्ण ढुंगेलयात सजाय माफीया निर्णय सर्वोच्च अदालतं यायेधुंकूगु दु ।

ओखलढुंंगाया उज्जनकुमार श्रेष्ठया हत्या अभियोगय् जन्मकैद सजाय न्यंकातःम्ह ढुंगेलं ४० प्रतिशत कैद भुक्तान यायेधुंकाः २०७५ या गणतन्त्र दिवसय् राष्ट्रपतिपाखे सजाय माफी बिउगु खः । ढुंगेलयात माफी बिउगु विरुद्ध लाःगु रिटय् अदालतं सरकारया निर्णय कानुन बमोजिम सदर याःगु खः ।

येँय् प्रदर्शन
रेशम चौधरीयात सरकारं थौं सुथय् त्वःतीगु खँ धाःगु दु । चौधरीयात त्वःतूगु खँय् छपुचः मनूतय्सं अझ नं विरोध यानाच्वंगु दुसा म्हिगः नेवाः समुदायं स्वतस्फुर्त रुपं असनय् प्रदर्शन याःगु दु । ज्याझ्वलय् चौधरीया पक्षय् वकालत याना वयाच्वंम्ह कानून व्यवसायी स्वागत नेपालं नं सम्बोधन यानादीगु खः । अथे हे नेवाः अभियन्तापिं शैलेश शाक्य बरेजु, रविन्द्र कुमार श्रेष्ठ अािदपिंसं सम्बोधन यानादीगु खः । ज्याझ्वलय् न्ववासें वय्कःपिंसं चौधरीयात कुने हे म्वाःगु खःसां कुनेगु ज्या याःगुलिं वय्कःयात तुरुन्त त्वःतेमाः धकाः माग यानादीगु खः । चौधरी छम्ह सोझाम्ह थारुया मचा जूगुलिं वय्कःयात हेपे यानाः कुनातःगु धासें सरकारं लाल आयोग सार्वजनिक यायेमाःगु माग नं याःगु खः ।