नःबहिलीं बोगी न्ह्यात
यल (नेपालभाषा टाइम्स)÷ दँय्दसं गुंलाबलय् जुइगु बोगी वनेगु ज्या गुंलाथ्व पारुया चान्हय् निसें सुरु जूगु दु । थुगुसी न्यकु जात्रा मतयाःया पाः लाःगु नःबहीपाखें बोगी न्ह्याःगु खः ।
सोमवाः चान्हय् १ बजे नःबहीली न्ह्याःगु बोगी सुथय् द्यः तुयू मजूतलेया दथुइ यलया थीथी बहाःबही चाःहिउगु खः । बोगी वनेबलय् मतयाः वनीबलय् गन गन वनेमाःगु खः अन अन वनेमाःगु परम्परा दु । थथे वनेबलय् सुथय् द्यः तुयु जुइगु इलय् गन थ्यन अन क्वचायेकाः कन्हय् कुन्हु हाकनं अनं निसें चाःहिलेगु याइ । थुकथं चाःहिलेबलय् प्यन्हु न्यान्हुया दुने मतयाः वनीगु फुक्क थाय् चाःहिलेसिधयेकी ।
उकिं बोगी वनेगुयात मतयाःया निंतिं लँ ठीक जू मजू स्वःवनेगु नं धायेगु याः । बोगी वनेबलय् नौबाजा थानाः चाःहिली ।
थ्वहे झ्वलय् थुगुसी मतयाःया पाः लाःगु नःबहीपाखें आइतवाः बोगी, मतयाः, गणेश पुजा, न्यकु बाजं ब्वज्या सम्बन्धी जानकारी बीगु नापं न्यकू बाजा प्रदर्शन याःगु दु । थुगुसी नःबहिली नौबाजं स्यनेगु ज्या मू गुरु धर्मबहादुर शाक्य व गुरु पूर्णरत्न शाक्यं यानादीगु खःसा न्यकु स्यनेगु ज्या गुरु राजु शाक्यं यानादीगु खः ।
ज्याझ्वलय् जानकारी बिउ कथं आइतवाः चान्हय्निसें बोगी न्ह्यायेधुंकूगु दुसा वइगु भदौ २ गते आइतवाः क्वन्तिइ नौबाजा ब्वज्या जुइ । अथेहे भदौ ५ गते सुथय् ४ बजे नःबहीली मुनाः मतयाः न्ह्याकीगु जुइ । थुकुन्हु हे ११ बजे नबहीपाखें पूधाः पिहां वनीगु जुइसा न्हिनय् १ बजे मंगलय् नौबाजा ब्वज्या जुइ । अथेहे भदौ ६ गते बुंगय् नौबाजा थायेगु ज्या जुइसा ७ गते स्वयम्भूइ नौबाजाः थायेगु व गणेश पुजाया नाय्खिं च्वयेकेगु ज्या जुइ ।
भदौ ८ गते गुंलागा पञ्चमी कुन्हु सुथय् १२ बजे नःबहिली मुनाः गणेश पुजा न्ह्याकीसा थुकुन्हु हे थीथी सिरपाः लःल्हायेगु व न्यकू जात्रा मतःयाया पाःब्व लःल्हायेगु ज्या जुइ । मतयाःया पाःब्व क्षेत्र नं. २ या मंगःत्वाःयात लःल्हाइ ।
न्यकू जात्रा मतयाः लिच्छवी जुजु बालार्चन देवं न्ह्याकूगु धापु दु । मतयाः अन्तर्गत बोगी, मतयाः, गणेश पुजा व नौबाजा ब्वज्या जुइ । लिच्छवीकालीन थ्व परम्परायात प्यसः दँ न्ह्यः जुजु सिद्धिनरसिंह मल्लं झिगू त्वाःयापिंत पालंपाः नौबाजा थानाः चाःहिलेगु प्रचलन न्ह्याकाथकूगु खः ।
LEAVE YOUR COMMENTS