चौधरी त्वःतकेत प्रक्रिया न्ह्यात

येँ (नेपालभाषा टाइम्स)- टिकापुर घटनाय् दोषी ठहर यासें कुनातःम्ह थारु नेता रेशम चौधरीया ल्यं दनिगु कैद सजाय माफी बीगु लागिं सरकारं प्रक्रिया न्ह्याकूगु दु । थुकिया लागिं चौधरीं बिउगु निवेदन ज्वनाः म्हिगः प्रधानमन्त्री पुष्पकमल दाहाल सहितया पुचः राष्ट्रपति रामचन्द्र पौडेलयात नापलानाः संविधान व कानुन कथं चौधरीयात गणतन्त्र दिवस कुन्हु माफी बीत सहलह ब्याकूगु खः ।

चौधरीयात माफी बीगु निवेदन राष्ट्रपति कार्यालयं अध्ययन यानाच्वंगु खँ धाःगु दु । राष्ट्रपति कार्यालयया राय कायेधुंकाः गृह मन्त्रालयं सजायँ माफीया नितिं मन्त्रिपरिषदय् प्रस्ताव यंकीगु खँ धाःगु दु । मन्त्रिपरिषदं निर्णय पारित यायेधुंकाः राष्ट्रपतिं गणतन्त्र दिवसया अवसरय् माफी बीगु निर्णय याइ ।

संविधानया धारा २७६ स राष्ट्रपतिं गुगुं अदालत, न्यायिक वा अर्धन्यायिक निकाय वा प्रशासकीय पदाधिकारी वा निकायं याःगु सजाययात कानुन कथं माफी, मुल्तवी, हिलेगु वा म्हो यायेफइगु खँ न्ह्यथनातःगु दु ।