बागमती सरकारय् मन्त्री थप

येँ (नेपालभाषा टाइम्स)- बागमति प्रदेशया सरकारय् थपे जूपिं खुम्ह मन्त्रीतय्त म्हिगः शपथ ग्रहण याकल । प्रदेश प्रमुख यादवचन्द शर्मां वय्कःपिंत पद व गोपनीयताया शपथ ग्रहण याकूगु खः ।

म्हिगः विस्तार याःगु मन्त्रिमण्डलय् कांग्रेसपाखें मसिना खड्का (वन तथा वातवरण), पुकार महर्जन (पर्यटन, उद्योग तथा सहकारी), उत्तम जोशी (स्वास्थ्य मन्त्री) थपे जूगु खःसा रामकृष्ण चित्रकार विना विभागीय मन्त्री जूगु खः ।

उकथं हे नेकपा एकीकृत समाजवादी पाखें लक्ष्मण लम्साल (श्रम, रोजगार तथा यातायात) व राजेन्द्रमान श्रेष्ठ (कृषि तथा पशुपक्षी विकास) नं मन्त्री नियुक्त जुयादीगु दु ।
बागमति प्रदेशय् २०७९ पुस २५ गते नेकपा एमाले व राप्रपाया समर्थनय् माओवादीया शालिकराम जम्मरकट्टेल मुख्यमन्त्री नियुक्त जूगु खः । राष्ट्रपति निर्वाचन लिपा केन्द्रया गठबन्धन हिलेवं राप्रपा व एमालें सरकार त्वःतूगु खः ।

वयां लिपा कांग्रेस व नेकपा एसं जम्मरकट्टेलयात विश्वासया मत बिउगु खः । वहे सहमति कथं मन्त्रिमण्डलय् कांग्रेस व नेकपा (एस) या मन्त्रीत नियुक्त याःगु खः ।