बालं बियातःगु विवरण बिउ वःपिं म्हो

येँ(नेपालभाषा टाइम्स)- येँ महानगरपालिकाय् घर बहाल विवरण ज्वनाः वइपिनिगु ल्याः गाक्कं म्हो जक दुगु खँ सीदुगु दु । येँ महानगरपालिकां वंगु फागुन ३ गते ‘घर बहाल व्यवस्था निर्देशिका–२०७९’ जारी याःगु खः । तर निर्देशिका जारी याःगु स्वला दयेधुंकाः नं विवरण ज्वना वइपिं छेँथुवाःया ल्याः धाःसा म्हो जक दुगु महानगरं न्ह्यथंगु दु ।

येँ महानगरपालिकां छेँ बालं बियातःपिं कानूनी दायराय् हयेगु ल्याखं उगु निर्देशिका जारी याःगु खः । निर्देशिका जारी याःगु स्वला दयेधुंकाः तकं बालं बियातःपिं छेँथुवाःत म्हो जक वयेगु यानाच्वंगु येँ महानगर राजस्व विभागया प्रमुख ध्रुव काफ्लें कनादीगु दु । छेँ बालं बियातःपिंसं बालं बिउगु वापत आम्दानीया निश्चित ध्यबा करया रुपय् स्थानीय तहयात बुझे यायेमाः । थुकियात हे व्यवस्थित यायेत व घर बहालयात कानूनी दायराय् हयेगु कुतःकथं निर्देशिका जारी याःगु खःसां प्रभावकारी जुइ फयाच्वंगु धाःसा मदु । विभागया कथं थौंकन्हय् मुश्किलं छम्ह निम्हेसिनं जक विवरण बुझे यायेत वयाच्वंगु दु, व नं स्वन्हु प्यन्हुया दुने ।

सुं व्यक्तिं थःगु छेँ, पसः, भवन, जग्गा आदि बालं बियातःगु दु धइगु खःसा उकिया वापत जुइगु आम्दानीया निश्चित ध्यबा करया रुपय् स्थानीय तहयात बुझे यायेमाःगु कानूनी प्रावधान दु । विभागया छगू तथ्यांककथं येँ महानगर दुने जक थौंकन्हय् प्यंगू लख स्वयां अप्वः छेँखाय् बालं तयातःगु दु । थुपिं सकसितं करया दायराय् हयेगु तयारी येँ महानगरं यानाच्वंगु दु ।

येँ महानगरपालिकां सकसितं करया दायराय् हयेगु नीतिलिसें उकियात प्रभावकारी रुपं कार्यान्वयन यायेगु उद्देश्यं निर्देशिका हःगु खः । निर्देशिकालिसें अबलय् ९० न्हुया सार्वजनिक सुचं नं पिथंगु खः ।

निर्देशिका जारी जूगु स्वला दयेधुंकाः तक नं विवरण बुझे याइपिनिगु ल्याखय् म्होति वयाच्वंसां जेठ व असारय् विवरण बुझे याइपिनिगु ल्याः अप्वइगु विश्वास महानगरं याःगु दु ।

छेँ बालं सम्बन्धी निर्देशिकाय् छेँथुवालं बालं बिउगु व छेँ त्वःता वंगु न्हय्न्हुया दुने वडा ज्याकूयात जानकारी बीमाःगु, लिखित सम्झौता यानाः छगू प्रति छेँथुवाः, छगू प्रति बालं काइम्हेसित व छगू प्रति सम्बन्धित वडा ज्यकूयात बीमाःगु,बालं बिउगुया ध्यबा, पुलेमाःगु मिति, बहाल कायम जुइगु अवधि, थप अवधि, निश्चित दिंया दुने बाः बी मफुसा जरिवाना लगायतया व्यवस्था यानातःगु दु ।