बागमति सरकारय् मन्त्री जुइपिं ग्वाःग्वाः

येँ (नेपालभाषा टाइम्स)- बागमती प्रदेशय् सरकार विस्तारया खँय् सहमति जुइ मफयाः अन्ततः सत्ता गठबन्धन दुने हे कचवं पिहां वःगु दु । मन्त्रालयया ल्याखय् दलतय् दथुइ सहमति जुइ मफुगुलिं कचवं पिहां वःगु खँ धाःगु दु ।

गठबन्धन दलतय्सं थःपिंत अप्वः मन्त्रालय माः धकाः दाबी यायेवं मन्त्रिपरिषद् विस्तार यायेत समस्या जुयाच्वंगु खः । सत्ता गठबन्धनय् कांग्रेसं खुगू मन्त्रालय माः धकाः दाबी यानाच्वंगु दु । मेखे माओवादी केन्द्रं नं थःपिंत मुख्यमन्त्री सहित प्यंगू मन्त्रालय माः धकाः दाबी यानाच्वंगु दु । उकथं हे नेकपा (एसं) निगू मन्त्रालय व हाम्रो नेपाली पार्टीं छगू मन्त्रालय माः धकाः दाबी यानाच्वंगु दु ।

मेखे नेकपा एकीकृत समाजवादीं थःपिंत नं सम्मानजनक थाय् मबिल धाःसा सरकारं पिने च्वनेगु ख्याच्वः बियाच्वंगु दु । ११ गू मन्त्रालय दुगु प्रदेशसभाय् भागबन्डा मिले यायेगु नितिं केन्द्रीय निर्देशन मवयाः समस्या जुयाच्वंगु खँ सी दुगु दु ।