‘धर्मशालाय् मारवाडीतय् हक मदु’

येँ (नेपालभाषा टाइम्स)- येँ जिल्ला अदालतं पशुपतिनाथ विकास कोषया गौशाला धर्मशालाय् मारवाडी सेवा समितिया गुगुं नं कथंया हक मदुगु व्याख्या याःगु दु । थ्व स्वयां न्ह्यः मारवाडी समुदायं धर्मशालाय् थःपिनिगु मोहियानी हक दुगु दाबी याना वयाच्वंगु खः ।

अदालतं करारया शर्त पालना मयाःगु अवस्थाय् पशुपति विकास कोषं सम्झौता अन्त्य यायेफइगु फैसला नं याःगु दु । फैसलाया खण्ड २३, २४ व २५ य् मारवाडी सेवा समिति व पशुपति विकास कोष दथुइ ब्वलंगु विवादया विस्तृत व्याख्या याःगु दु । जिल्ला अदालतं मारवाडी सेवा समितिपाखे प्रमोद अग्रवालं दायर याःगु फिरादय् दाबी मगाःगु धासें खारेज जुइगु फैसला नं याःगु दु ।

फैसलाया पूर्ण पाठय् मारवाडी सेवा समितिं पशुपति क्षेत्र विकास कोष लिसे याःगु सम्झौताय् मोहियानी हक मदुगु खँ स्वीकार यायेधुंकूगु व थ्व स्वयां न्ह्यः सर्वोच्च अदालतं याःगु फैसलाय् नं थ्व विषय क्वःजीधुंकूगुलिं आः हाकनं उगु विवाद न्ह्यथने आवश्यम मदुगु खँ न्ह्यथनातःगु दु ।
धर्मशालाया ९ रोपनी स्वयां अप्वः जग्गा उपभोग याःगु बापत मारवाडी सेवा समितिं पशुपति विकास कोषयात दछिया ५१ हजार तका जक बाः पुला वयाच्वंगु खः । अदालतं उगु बाः नं युक्तिसंगत मजूगु फैसला याःगु दु ।

उकथं हे फैसलाय् मारवाडी सेवा समिति व कोष दथुइ २०६० साल जेठ २२ य् जूगु सम्झौता उल्लंघन जूगु, धर्मशालाय् सटर दयेकाः व्यापारिक प्रयोजनं बालं बिउगु, उकिं वःगु आय सर्वसाधारण खनीगु, सीगु कथं सार्वजनिक मयाःगु व गैरनाफामूलक लिसें विशुद्ध सर्वसाधारणया सेवा वा धार्मिक ज्याया नितिं जक छ्यःगु धइगु प्रष्ट आधार खनेमदुगु खँ नं न्ह्यथनातःगु दु ।

उकथं हे मारवाडी सेवा समितिं करारया शर्त अःखः पशुपति गौशाला धर्मशाला क्षेत्रया सम्पत्तियात आर्थिक लाभाया स्रोतया रुपय् छ्यलाः उकिया मनासिव अंश प्रतिवादी पक्षयात मबिउगु खःसा प्रतिवादी पक्षं उगु विषयय् क्षतिपूर्ति दाबी यानाः फिराद उजुर यायेफइगु खँ नं फैसलाय् धयातःगु दु ।

मेखे येँ जिल्ला अदालतया फैसलाविरुद्ध मारवाडी सेवा समितिं उच्च अदालत यलय् पुनरावेदन याइगु जूगु दु । जिल्ला अदालतया पूर्ण पाठ वयेवं समितिं पुनरावेदन यायेत्यंगु खः ।
समितिया अध्यक्ष प्रमोद अग्रवालं जिल्ला अदालतया फैसला विरुद्ध पुनरावेदन यायेगु नितिं थःगु कानुनी पुचलं अध्ययन यानाच्वंगु धाःगु दु ।