ठेकेदार कारवाही बारे गृह व भौतिक मन्त्रालय दथुइ विवाद

येँ- सरकारं न्ह्याकाच्वंगु आपालं विकास निर्माणया परियोजना इलय् पूमवंकीपिं ठेकेदार कम्पनीतय्त कारवाही यायेगु धकाः गृह मन्त्रालयं पहल सुरु याःसां उकी भौतिक पूर्वाधार तथा यातायात मन्त्रालयं विरोध प्रकट याःगु दु ।

गृह मन्त्रालयं यायेत्यंगु थ्व ज्या वास्तवय् थःपिनि अधिकार क्षेत्रय् याःगु हस्तक्षेप खः धकाः भौतिक पूर्वाधार मन्त्रालयं विरोध याःगु खः ।
गृह मन्त्रालयं धाःसा सरकारी परियोजनात इलय् सिमधयेकीगु ज्यायात राष्ट्रिय सुरक्षा मामिलालिसे स्वानाः थ्व कारवाही न्ह्याकेगु पहल सुरु याःगु खः ।

ज्या सुरु यानाः ताः ई तक हे सिमधयेकुसे तयातःगु कारणं उकिं आपराधिक ज्याखँ याइपिंत सुविधा जुयाच्वंगु खँ गृहया सूत्रं धाःगु दु । गुलिखे ततःजाःगु भवनत ‘स्ट्रक्चर’ जक सियेधकाः अथें तयातःगुलिं अज्याःगु थाय् आपराधिक गतिविधि जुइगु स्थल जू वनाच्वंगु कारणं थुकिं सुरक्षाय् समेत खतरा वःगु दावी गृहं याःगु दु ।

नापं पिने ताः ई तक हे निर्माण सामग्री वांछ्वया तइबलय् उकिं लँय् जुइपिं मनूतय्त समेत समस्या जूगु जुयाः नं थुकथंया कारवाही न्ह्याकेमाःगु खँ गृहं धाःगु दु ।

गृह मन्त्रालयं अथे ज्या पूरा मयाःपिं ठेकेदारतय्गु नां धलः तयार यानाः छ्वया हजि धकाः देय्न्यंकंया सीडीओतय्त निर्देशन समेत बिया छ्वयेधुंकूगु दु ।

तर भौतिक पूर्वाधार मन्त्रालयं धाःसा इलय् ज्या सिमधयेकीपिं ठेकेदार कम्पनीतय्त कारवाही यायेगु अधिकार थःपिंके जक दु धासें गृहया ज्यां थःपिनि क्षेत्राधिकारय् हस्तक्षेप याःगु द्वपं बिउगु दु । इलय् ज्या पूरा मयाइपिं ठेकेदारयात ठेक्का रद्द यायेगु, बं पुइकेगु, लाइसेन्स खारेज यायेगु तकया अधिकार भौतिक पूर्वाधार मन्त्रालययाके दु ।

थौंकन्हय् गृहमन्त्री माओवादीपाखें वःम्ह रामबहादुर थापा खःसा भौतिक पूर्वाधार मन्त्री एमालेपाखें वःम्ह रघुवीरमहासेठ खः । मन्त्री महासेठं थःपिनि कार्यक्षेत्रय् हस्तक्षेप जूगुलिं गृहयात थ्व ज्या याके बी मखु धकाः औपचारिक रुपं हे विरोध यानादीधुंकूगु दु ।

विवादया मू कारण छु ?

इलय् ज्या सिमधयेकीपिं ठेकेदारतय्त कारवाही यायेगु धकाः न्ह्याकूगु थ्व पलाः विवादय् लाःगुया कारण सरकारी निकायतय् दथुइ समन्वय मदयाः खः धाःगु दु । अथे खःसां गुलिखे विज्ञ सूत्रतय्सं धाःसा थुकिया मू कारण समन्वय मदयाः सिबें नं कमिशनया खेल जुयाः खः धाःगु दु । ठेकेदारतय्सं भौतिक पूर्वाधार मन्त्रालयया च्वंनिसें क्वय् थ्यंक हे च्वंपिं कर्मचारीतय्त ध्यबा नकाः थःगु ल्हातय् कयातःगु दु । उकिं भौतिक पूर्वाधार मन्त्रालयं उमित कारवाही याइ हे मखु । छगू कि छगू त्वहःचिनाः छुट हे बी ।

आः गृह न्ह्यःने वल धाःसा थःत कमिशन नका तःपिं ठेकेदारयात कारवाही जुइ धकाः उमिगु हे बचाउया लागिं थ्व ‘क्षेत्राधिकार’ या मुद्दा ल्ह्वना हःगु खँ सूत्रं धाःगु दु । निगू मन्त्रालयया थ्व विवादं यानाः अन्ततः थ्व कारवाहीया कुतः नं फ्यासुया वने फुगु नं सूत्रया दावी दु ।