धर्नाकर्तातय्त टियर ग्यास कयेकल, विद्या श्रेष्ठ बेहाेश
पवित्र कसाः, रमेशमान पिया, गौतम मानन्धर लगायत झिंछम्हेसित ज्वन
येँ – गैरकानुनी रुपं नेवाःतय् छेँ थुनाः जुयाच्वंगु सतक विस्तारविरुद्ध माइतीघर मण्डलाय् जूगु धर्नाय् ज्वना यंकूपिंत त्वःतकेगु निंतिं लँ बन्द याःपिंत प्रहरीं टियर ग्यास कयेकाः ख्यानाछ्वःगु दु ।
धर्नाया झ्वलय् प्रहरीं लाठीचार्ज यानाः न्हय्म्हेसित ज्वना यंकूगु खः । धर्ना ज्याझ्वः न्हिनय् १ बजे तक तयातःगु खःसां ज्वना यंकूपिंत १० मिनेट दुने मत्वःतल धाःसा लँ बन्द जुइक बीगु ख्याच्वः धर्नाकर्तातय्सं बिउगु खः । तर नं ज्वनायंकूपिंत मत्वतेवं धर्नाकर्तातय्सं माइतीघरं वानेश्वर वनेगु लँ बन्द यानाबिउगु खः ।
लँ बन्द याःपिंत प्रहरीं टियर ग्याँस कयेकेगु लिसें लःया फोहरां छ्वाकाः ख्यानाछ्वःगु खः । थ्व इलय् नं प्रहरी नेवाः न्ह्यलुवा कार्यकर्ता रमेशमान पिया लिसें प्यम्हेसित ज्वनायंकूगु खः । प्रहरीया आक्रमणय् लानाः बांमलाक घाःपाः जूम्ह विद्या श्रेष्ठयात अस्पताल यंकूगु दु ।
थ्वयां न्ह्यः प्रहरीं कृष्ण मानन्धर, नरेश मानन्धर, गौतम मानन्धर, गणपति लाल श्रेष्ठ, पवित्र कसाः, श्यामकृष्ण प्रजापतिपिंत ज्वनायंकूगु खः । ज्वनायंकूपिंत आः वानेश्वर प्रहरी परिसरय् तयातःगु दु । उमित त्वःतकेगु निंतिं अधिवक्ता शंकर लिम्बु, श्रीकृष्ण महर्जन लगायतयापिं प्रहरी परिसरय् वनाच्वंगु दु ।
LEAVE YOUR COMMENTS