धर्मकीर्तिया स्वदँया वार्षिक भेला

येँ(नेपालभाषा टाइम्स)- थनया सीघःस्थित धर्मकीर्ति विहारया धर्मकीर्ति बौद्ध अध्ययन गोष्ठिया स्वदँया वार्षिक भेला छक्वलं जूगु दु । कोरोना संक्रमणया कारणं जुइ मफयाच्वंगु अध्ययन गोष्ठिया ४९, ५० व ५१ क्वःगु यानाः स्वदँया वार्षिक भेला वंगु शनिवाः जूगु खः ।

धर्मकीर्ति विहारया हे धम्महलय् जूगु वार्षिक भेला श्रद्धेय अनागारिका धम्मवती गुरुमांया सभापतित्वय् श्रद्धेय भिक्षु पञ्ञासार महास्थविरया प्रमुख आतिथ्यताय् जूगु खः ।

गोष्ठिया छ्याञ्जे लोचनतारा तुलाधरं वार्षिक प्रगति विवरण व दांभरिं श्यामलाल चित्रकारं आर्थिक प्रतिवेदन न्ह्यब्वयादीगु भेलाय् ज्यासना पुचःया दुजः मचाकाजी महर्जनं गोष्ठिपाखें शनिवाःपतिकं जुयाच्वंगु प्रवचन कक्षाया प्रतिवेदन व मीनशोभा शाक्यं पुस्तकालयया प्रतिवेदन न्ह्यब्वयादीगु खः ।

नेपाःया थेरवाद बुद्धशासनया च्वन्ह्याकेगु व बुद्ध धर्मया ख्यलय् दुग्यंगू ग्वाहालि यानादीगुलिं धर्मकीर्ति विहार संरक्षण कोषया लिउदांभरि अरुणसिद्धि तुलाधरयात धर्मकीर्ति अश्वघोष सम्मान व अध्ययन गोष्ठिया दुजः मीनशोभा शाक्ययात धर्मकीर्ति धम्मवती सम्मानं सम्मानित याःगु खः ।

वय्कःपिंत उगु सम्मान भिक्षु पञ्ञासार महास्थविर व श्रद्धेय धम्मावती गुरुमांनं लःल्हानाबिज्याःगु खः । थुपिं निगुलिं सम्मान मय्जु डा. रीना बनिया तुलाधरं नीस्वनादीगु खः ।

ज्याझ्वलय् थःगु नुगःखँ तयाबिज्यासे मूपाहां भिक्षु पञ्ञासार महास्थविरं अध्ययन गोष्ठियात ताःकालतक न्ह्याकेत थःपिं जक मखसे थः मस्तय्त नं न्ह्यचिलेत तीबःबीमाःगु खँय् बः बियाज्यासे थःगुपाखें नं माःगु इलय् माःकथं ग्वाहालि यानाच्वनेगु जुइ धयाबिज्यात ।

सभापतिया थासं श्रद्धेया अनागारिका धम्मावती गुरुमांनं बुद्ध धर्मयात चीर स्थायी यायेत ल्याय्म्ह पुस्ताया तःधंगु ल्हाः दइ धयाबिज्यासे उकिया निंतिं थःपिं जक मखु छेँजःपिंत स्यनेकने यायेत व बुद्ध धर्मया ज्याझ्वलय् सहभागि याकायंकेमाःगु खँ कनाबिज्यात ।

उगु भेलां अध्ययन गोष्ठिया न्हूगु ज्यासना पुचःया नं ल्यज्या याःगु खः । ल्यज्याकथं न्हूगु ज्यासना पुचलय् नायः श्रद्धेय धम्मावती गुरुमां, न्वकु श्रद्धेय इन्दावती गुरुमां, न्वकु वीर्यवती गुरुमां छ्याञ्जे लोचनतारा तुलाधर, लिउछ्याञ्जे मचाकाजी महर्जन, दांभरिं रामकुमारी मानन्धर व लिउ दांभरिंलय् दिना कंसाकार च्वनादीगु दु ।

थुकथं हे दुजलय् उर्मिला ताम्राकार, सरोज मानन्धर, सुभद्रा स्थापित, सुमित्रा तुलाधर, उर्मिला तुलाधर, इन्द्रमान महर्जन, केशब डंगोल व प्रबिन महर्जन च्वनादीगु दु ।