येँ मनपापाखें उद्यमशील तालिम संचालन
येँ- येँ महानगरपालिकां आर्थिक स्थिति कमजोर जूपिं, न्यून आय व दलिततय्त लक्षित यानाः उद्यमशील तालिम संचालन याःगु दु । येँ मनपां तत्कालया निंतिं १० गू वडाय् थुकथंया तालिम संचालन याःगु खः ।
येँ महानगरपालिकां आर्थिक स्थिति कमजोर, न्यून आय व दलित मिसातय्त सशक्त यायेगु लक्ष्यया लिसें थीथी कथंया उद्यमशील तालिम संचालन याःगु खः । येँ मनपा व घरेलु तथा साना उद्योग संघ, येँया मंकाः ग्वसालय् न्ह्याःगु तालिमय् प्रत्येक वडापाखें १५ म्ह मिसापिं सहभागि जुयाच्वगु दु ।
येँ मनपा व संघया मंकाः ग्वसालय् येँ महानगरपालिका वडा नं. २, ३, ४, ५, ६, ७, ८, १०, १३, व १४ वडाय् उकथंया तालिम संचालन जुयाच्वंगु दु । तालिमया उलेज्या यासें येँ महानगरपालिकाया कार्यवाहक प्रमुख हरिप्रभा खड्गी श्रेष्ठं निम्ह प्यम्हेसित जक तालिम बीबलय् उकिया लिच्वःयात मापन याये मफइगुलिं इच्छुक सकसितं तालिमय् सहभागि यानाः व्यवस्थित व योजनावद्ध सीप प्रशिक्षण बीगु मुख्य उद्देश्य जूगु जानकारी बियादिल ।
येँ मनपा १४ वडाया अध्यक्ष शोभा सापकोटां तालिमय् सहभागि जुयाच्वंपिं सकलें थःथःगु वडापाखें छनोट जुयाः वःपिं खः धासें तालिमय् सहभागि जुयाच्वंपिं म्हो आय दुपिं, दलित व एकल मिसायात प्राथमिकता बियाः तालिमया निंतिं छनोट यानागु खः धयादिल ।
अथे हे संघया अध्यक्ष सीता कार्कीं बाःछितक सैद्धान्तिक तालिम लिपा ल्यं दुगु न्यान्हु उत्पादन जूगु हलंज्वलंया बजाः लक्ष्य, बजारय् थ्यंकेगु, मीगु व बजाःया निंतिं आवश्यक प्रबन्ध मिले यायेगु लगायत थीथी सीपया तालिम बीगु योजना दु धयादिल ।
प्रशिक्षार्थीतय्त लाकां, चप्पल, ब्याग, मोतिया माः हनेगु, तिसा दयेकेगु नापं सिलाई बुनाइ, साब्वं, जेरी, अचार, नेपाली भ्वंया थीथी ज्वलं दयेकेगुलिसें सौन्दर्यकर्मिया तालिम बी ।
LEAVE YOUR COMMENTS