नेवाः कला व संस्कृति सीके मबीगु प्रधानमन्त्रीया बचं

नेपालभाषा टाइम्स

येँ- प्रधानमन्त्री केपी ओलीं नेपाःया मुख्य सांस्कृतिक सम्पदाया वैभव धइगु हे नेवाःतय् कला व संस्कृति खः धयादीगु दु । वय्कलं नेपाली कला संस्कृति धइगु हे नेपालभाषा नापं नेवाःतय् कला संस्कृति हे खः धयादिल ।

ज्यापु सांस्कृतिक विकास कोषया ग्वसालय् म्हिगः जूगु झिंन्याक्वःगु ज्यापु दिवसया लसताय् जूगु ज्याझ्वलय् न्ववासें वय्कलं उगु खँ धयादीगु खः । दक्वं भाषाभाषी मिले जुयाः निर्माण जूगु नेपाःया विविधताया संरक्षण यायेगु ज्याय् झी सकलें जायेमाःगु खँय् बः बियादिसें उकिया निंतिं दक्वं पक्ष सजग व सचेत जुइमाः धकाः नं वय्कलं धयादिल । वय्कलं धयादिल, ‘झीगु कला, संस्कृति व गौरवयात सितिं छ्वयेगु ज्या गुगुं हालतय् नं जुइ मखु, उकिया निंतिं जिं प्रण यानाच्वना ।’

भुखाचं क्षति जूगु पुरातात्विक महत्वया सम्पदायात ध्यानय् तयाः न्हूगु निर्माण यायेमाःगु हाथ्या दु धासें वयकलं न्ह्यागु थासं स्वःसां खने दइगु धरहरा वइगु निदँया दुने दयेके सिधयेकेगु दावी नं यानादिल । अथे हे भुखाचं क्षति जूगु मेमेगु पुरातात्विक सम्पदा व स्मारक नं याकनं निर्माण याये सिधयेकेगु खँ नं धयादिल । उगु इलय् प्रम ओलीं स्मारिकाया विमोचन नापं भाषा, कला संस्कृति, साहित्य, कासा लगायत थीथी क्षेत्रय् योगदान बियादीपिंत सम्मान नं यानादीगु खः। लानिपुखूया हालत इतिहासय् दकलय् बेहाल जूगु धासें आः उकिया नं याकनं पुनःनिर्माण याये सिधयेकेगु खँ वय्कलं धयादिल ।

येँ महानगरपालिकाया प्रमुख विद्यासुन्दर शाक्यं महानगर लागा दुनेया भेषभूषा, कला, संस्कृतियात संरक्षण यानातयेगु निंतिं थःपिं प्रतिवद्ध दु धयादिल । कोषया नायः मंगलकृष्ण सिंहया सभापतित्वय् ज्याझ्वः जूगु खः ।