परियत्ति शिक्षा प्रचारया छगू कुतः

परियत्ति शिक्षायात ब्वनेकुथिइ नं प्रचार याना यंके फुसा ब्वनामिपिंके नैतिकता व सुचरित्र विकास जुइ धयागु छगू आशा खः, गुकिं भावी पिँढियात नं ताःलाका बी । उकिं मैत्रेय युवा संघ दिक्क मचासे न्ह्यःने वनाच्वंगु दु । थःगु नीन्यादँया इतिहास पुइका स्वल धाःसा संघं न्ह्याकाच्वंगु थीथी ज्याझ्वलं युवावर्गयात सकारात्मक लिच्वः लाःगु व नैतिकवान, चरित्रवान व्यक्तित्व विकास यायेगु आज्जु भचा जक जूसां पूवंगु दु । थुकियात अझ ताःलाका यंकेत मैत्रेय युवा संघं परियत्ति शिक्षायात ग्यसुलाःगु माध्यमकथं नालाकाःगु खः । उकिं संघं ख्वपया थीथी ब्वनेकुथिइ वनाः परियत्ति कक्षा न्ह्याकेत पहल याःगु खः । थ्व हे झ्वलय् ख्वपया खुगू ब्वनेकुथिइ परियत्ति कक्षा न्ह्यात ।

तर थौंकन्हय् एभरेष्ट ई।स्कुल व जेन्युइन ई। स्कुल बाहेक मेपिं भचा लिचिउगुलिं दुःख लगे जू । परियत्ति शिक्षाया सार्वजनिक महत्वयात मथूगुलिं वा थुइका बी मफुगुलिं थथे जूगु खःला धयाथें च्वं । छगू निगू न्हूगु ब्वनेकुथिपाखें परियत्ति कक्षा न्ह्याकेत इच्छा नं यानाच्वंगु दु । थुकियात कार्यान्वयन यायेगु व पुलांगु ब्वनेकुथिइ हाकनं परियत्ति कक्षा न्ह्याकेत छुं प्रभावकारी ज्याझ्वः यायेमाल धयागु महशुस जुल ।

परियत्ति शिक्षां यानाः ब्वँमिपिंके नैतिक व चारित्रिक सुधार जूगु अनुभव शिक्षकपिंसं हे प्वंकाच्वंगु दु । अथे जूगुलिं परियत्ति शिक्षायात अझ ब्यापक याना यंकेत ब्वनेकुथिया शिक्षक शिक्षिकापिंत बुद्धशिक्षाया ज्ञान बीगु सान्दर्भिक जू । थ्व बिचाःयात कःघानाः संघं बुद्धशिक्षाया आधारभूत तालिम न्ह्याकेगु कुतः याःगु जुल । मैत्रेय युवा संघया रजतजयन्तीया अवसर लाकाः थ्व तालिम बीगु तातुनाः संघया न्वकू तिर्थराज वज्राचार्यया संयोजकत्वय् छगू कमिटी नीस्वन । अले छसिकथं तालिमया तयारी न्ह्यात ।

दकलय् न्हापां तालिमया निंतिं विषय व प्रशिक्षक ल्ययेगु ज्या जुल । अले तालिम शुरु यायेगु न्हि क्वःछिनाः तालिम सम्बन्धी जानकारी सहित थीथी ब्वनेकुथिइ सहभागिताया निंंतिं पौ वन । नीम्ह ९२०० स्वयां अप्वः शिक्षक शिक्षिकापिंसं ग्वाहालि स्वरुप सहभागिताया निंतिं छम्हेसिया १०००÷–ल्याखं दां तयाः नां दुतिन । विषय व प्रशिक्षक ल्ययेगु ज्या नं क्वचाल । उल्लेख जूकथंया प्रशिक्षकपिंत पौ वन । अप्वः यानाः बौद्ध विद्वानपिंसं प्रशिक्षणया निंतिं ई बियाबिज्यात ।

तालिमया तालिकाअनुसार न्हापांगु प्रशिक्षण बौद्धविद्वान कृष्णकुमार प्रजापतिं २०७८ बैशाख ११ गते बुद्धधर्मया विविध पक्ष विषयय् जयकीर्ति विहार थथुबहिलिइ प्रशिक्षण बियादिल । न्हापांगु न्हिया प्रशिक्षणय् ब्वति कयाः प्रशिक्षार्थीपिंसं गहन विषय जूसां बुद्धधर्म सम्बन्धी ज्ञान हासिल यायेखंगु प्रतिक्रिया वल । दुर्भाग्यबस कोभिड –१९ या निगूगु लहर तच्वः जुयाः देशय् हानं लकडाउन जुल । थुकिं यानाः तालिकाअनुसार प्रशिक्षण न्ह्यज्याये मफुत ।

बैशाख १६ गतेया लकडाउन निसें दिनाच्वंगु आधारभूत बुद्धशिक्षाया तालिम २०७८ भदौ ६ गतेनिसें जूम प्रविधिमार्फत अनलाइनं प्रशिक्षण यायेगु क्वःजित । शनिवाः व बुद्धवाः यानाः वाःया निक्वः प्रशिक्षण न्ह्यात । नीनिम्ह प्रशिक्षार्थीपिंत झिंनिम्ह प्रशिक्षकपिंसं क्वय् च्वयाकथं विषयय् प्रशिक्षण बियादिल ।

— श्रद्धेय भिक्षु मेधंकर– बुद्धधर्मया इतिहास
— श्रद्धेय भिक्षु गरुको ९अर्जुन भन्ते० – गृहिविनय
— श्रद्धेय अरियञाणी गुरुमां – सप्तसत्पुरुष धन
— प्रा। मदनरत्न मानन्धर – चतुब्रम्ह विहार व बुद्धशिक्षाया आवश्यकता
— प्रा। डा। त्रिरत्न मानन्धर– पालि साहित्य
— अमिता धाख्वा– चतुरार्य सत्य
— सबिता धाख्वा – शील सदाचार वBuddhism and Leadership
— जुनु बासुकला –चैत्यया महत्व
— संचित बुद्धाचार्य – धर्मगुण
— श्रद्धेय ञाणवती गुरुमां –बुद्ध शिक्षाको विशेष कक्षा
— आचार्य खगेश्वर अर्याल – विपश्यनाया परिचय

च्वय् उल्लेख जूगुमध्ये आश्विन १३ गते भौतिक रुपं हे जयकीर्ति विहार थथुबहिलिइ तालिम जूगु जुल । उगु न्हि ञाणवती गुरुमांपाखें बुद्धशिक्षाया विशेष कक्षा जूगु जुलसा विपस्सना विषयय् आचार्य खगेश्वर अर्यालं विपस्सनाया परिचय विषयय् कक्षा व अभ्यास जुल । थुकथं फुक्क प्रशिक्षण क्वचाःगु जुल । भौतिक रुपं जूगु तालिम ज्याझ्वलय् तालिम कक्षाया ब्यवस्थापनलिसें सकसितं जलपानया ब्यवस्थापन यायेत संघया कार्यकारि दुजःपिं माइला दोङ्ग, सपुत तामाङ्ग, मेघना श्रेष्ठ, लुनिभा चित्रकार, गंगा श्रेष्ठ लगायत सकसियापाखें नं उलि हे ग्वाहालि दत ।

तालिम क्वचाय् धुंकाः २०७८ आश्विन १६ गते बुद्धशिक्षाया आधारभूत तालिमया समापन ज्याझ्वः जुल । भिक्षु मेधंकरया प्रमुख आतिथ्यताय् भिक्षु धम्मसोभन महास्थविरं दीप प्रज्वलन यासें पञ्चशिल बियाबिज्याःगु तालिम समापनया ज्याझ्वलय् प्रशिक्षार्थीलिसें प्रशिक्षकपिंत दसिपौ नापं मैत्रीचिं उपहारकथं चैत्य लःल्हाःगु खः । बौद्ध समकृत विहार कुथुबहिलिइ जूगु ज्याझ्वलय् विद्यार्थीपिंत नैतिकवान व चरित्रवान यायेगु ताःतुनाः २०७१ सालनिसें मदिक परियत्ति शिक्षा न्ह्याका वयाच्वंगुलिं एभरेष्ट स्कुलयात व २०७४ सालनिसें मदिक न्ह्याका वयाच्वंगुलिं जेन्यूइन स्कुलयात कदर स्वरुप चैत्य व सफू नं धर्मोपहार स्वरुप लःल्हात ।

ज्याझ्वलय् थःगु नुगः खँ तयेगु झ्वलय् बौद्ध विद्वान मदनरत्न मानन्धरं बुद्धधर्मं समाजयात इमान्दार व मेहनति जुइत ग्वहालि याइगु खँ कनादिल । एभरेष्ट स्कुलया प्रिन्सिपल भक्त राजभण्डारीं परियत्ति शिक्षां मस्तय्त जेहेन्दार जुइत व दानी चरित्रया विकास यायेत ग्वाहालि जूगु खँ कनादिल । अथे हे जेन्यूइन स्कुलया भाइस प्रिन्सिपल अनन्त घिमिरें धर्म धयागु मानव धर्म खः धासें सम्प्रदाय धर्म जुइफइमखु धयादिल ।

समापन ज्याझ्वलय् प्रशिक्षार्थीपिं एभरेष्ट स्कुलया प्रकृति न्यौपाने, जेन्यूइन स्कुलया सुधादेवी श्रेष्ठ, कालिका माध्यमिक विद्यालयया पम्फा लामिछाने व नविन आधारभूत स्कुलया प्रद्युम्न पौडेलं तालिमया अनुभव सम्बन्धय् थःथःगु नुगः खँ कँसे, बुद्ध बूगु देय् धकाः गर्व याइपिं झी नेपाःमिपिं बुद्धशिक्षा बारे अनभिज्ञ व अनजान जुयाच्वनेगु दुःखया खँ खः, बुद्धशिक्षा सुयातंं बौद्ध यायेत बीगु शिक्षा मखु खनि । थ्व ला मनूतय्त नैतिकवान व चरित्रवान याइगु शिक्षा खः । उकिं मेमेगु स्कूलय् नं परियत्ति शिक्षा लागू जुया वनेमाःगु खँय् बः बियादिल ।

संघया अध्यक्ष लक्ष्मीचन्द्र वज्राचार्यया सभापतित्वय् जूगु ज्याझ्वलय् तालिमया संयोजक तिर्थराज बज्राचार्यं परियत्ति शिक्षाया आवश्यकता व महत्वया विषयय् खँ कनादीगु खःसा प्रमिला धुख्वां सुभाय् बियादीगु खः । तालिमय् थीथी ब्वनेकुथिया शिक्षक शिक्षिका लगायतपिनिगु सहभागिता दुगु खः । थुकथं क्वचाःगु तालिम व उकिया समापन ज्याझ्वलं परियत्ति शिक्षायात स्कुल स्कूलय् प्रचार प्रसार न्यंका वनेत ग्वाहालि जुइ धयागु सकसिनं अनुमान याःगु दुु ।
भवतु सब्ब मङ्गलं ।।

न्ह्यब्वःम्ह – लक्ष्मीचन्द्र बज्राचार्य

सम्बन्धित बुखँ

LEAVE YOUR COMMENTS