कमलाछि दुहां वयेगु थासय् सिंहया मूर्ति तइगु

येँ (नेपालभाषा टाइम्स)÷ येँया कमलाछि दुहां वयेगु लँपुइ निम्ह सिंह तइगु जूगु दु । येँ महानगरपालिका २७ वडाया अध्यक्ष योगेशकुमार खड्गी बियादीगु जानकारी कथं न्हापा कमलाछि दुहां वयेगु लँपुइ जवय् खवय् निम्ह सिंहया प्रतिमा दुगु खः । उगु सिंहया प्रतिमा छुं कारणं मेगु हे वडाय् यंकाः तःगु जुयाच्वन । आः कमलाछीइ न्हूगु सिंहया मूर्ति दयेका तयेत्यंगु खः ।

कमलाछि दुहां वयेगु थाय्यात सिँध्वाखा धाइगु खः । न्हापा थन सिंह सहित ध्वाखा दुगु जुयाच्वन । उकिं हे थ्वयात सिंध्वाखा धाइगु जुयाच्वन । थ्व बारे थःत जानकारी वयेवं थम्हं अन सिंह तयेगु योजना दयेकाः ज्या न्ह्याकागु खँ वय्कलं कनादीगु दु । वय्कलं धयादिल, ‘न्हापा स्थानीय मनूतय्सं सिँध्वाखाय् वनेगु धाइगु जुयाः जिं अन सिँया ध्वाखा दुगु खःला धकाः च्वनागु, तर पुलांपिं मनूतय्सं ध्वाखाया जःखः सिंह दुगुलिं उगु ध्वाखायात सिंध्वाखा धाःगु खँ कन ।’

कमलाछि दुहां वयेवं खवय्पाखे दुगु गणेद्यः लिक्क न्हापा सतः छगू नं दुगु खः । आः उगु सतः नं पुनर्निर्माण यायेगु कथं ज्या जुयाच्वंगु खँ वय्कलं कनादीगु दु ।