वैदेशिक रोजगारीइ वनेगु ज्या यायेत मोबाइल एप
येँ – वैदेशिक रोजगारीइ वनीपिनिगु ज्याः याउँक अःपुक यायेगु निंतिं श्रम मन्त्रालयं एकीकृत अनलाइन व्यवस्थापन प्रणाली व मोबाइल ऐप सेवा सुरु याःगु दु । थ्व ऐपपाखें वैदेशिक रोजगारी सम्बन्धी फुक्क ज्याखँया जानकारी व सुचं कायेफइगु खँ धाःगु दु । थ्व ऐपया व अनलाइन प्रणालीं यानाः आवंलिं वैदेशिक रोजगारीइ वनीपिं ज्यामित ठगे जुइपाखें बचे जुइफइगु खँ श्रम मन्त्रालयं धाःगु दु ।
अथे हे सरकारं एकीकृत वैदेशिक रोजगार सूचना व्यवस्थापन प्रणाली पाखें वैदेशिक रोजगारय् वनीपिं नेपाःमितय् तथ्यांक नं मुंकीगु जूगु दु । थुकिया निंतिं अध्यागमन विभागं मन्त्रालययात ग्वाहालि याइगु खँ धाःगु दु ।अध्यागमन विभागया महानिर्देशक ईश्वर पौडेलं कानुनी रुपं वैदेशिक रोजगारय् वनीपिं नेपाःमितय् तथ्यांक मुंकेगु निंतिं सहजिकरण यायेगु खँ न्ह्यथनादिसें थुकिया निंतिं डाटाबेस सम्बन्धित मन्त्रालयय् स्वायेगु ज्या जुयाच्वंगु खँ कनादीगु दु ।
वैदेशिक रोजगारी ख्यलय् खनेदुगु यक्व समस्या ज्यंकेगु निंतिं थ्व प्रणालीं ग्वाहालि याइ ।
थुकिं बेक्वःगु नियत दुपिंत नं तप्यंकेत ग्वाहालि याइ धयागु जितः विश्वास दु
श्रम मन्त्री गोकर्ण विष्ट
श्रम मन्त्री गोकर्ण विष्टं थ्व प्रणाली वैदेशिक रोजगारी क्षेत्रय् छगू महत्वपूर्ण उपलब्धि जूगु खँ धयादीगु दु । थ्व प्रणालीया ग्वाहालिं वैदेशिक रोजगारी सम्बन्धी जानकारी चुलाइगु लिसें रोजगारीया ज्या अनलाइन पाखें जुइगु, आर्थिक ल्याःचाः पारदर्शी जुइगु व गलत सुचंया आधारय् जुइफुगु ठगीयात नियन्त्रण यायेफइगु खँ धाःगु दु ।
श्रम मन्त्री बिष्टं बिबिसीलिसे खँ ल्हासें धयादीगु दु, ‘वैदेशिक रोजगारी ख्यलय् खनेदुगु यक्व समस्या ज्यंकेगु निंतिं थ्व प्रणालीं ग्वाहालि याइ । थुकिं बेक्वःगु नियत दुपिंत नं तप्यंकेत ग्वाहालि याइ धयागु जितः विश्वास दु ।’अध्यागमन विभाग, राहदानी विभाग, कुटनीतिक नियोगत, वैदेशिक रोजगार विभाग, वैदेशिक रोजगारी व्यवसायीत थ्व प्रणालीइ आवद्ध जुइधुंकूगु खँ धाःगु दु ।
अथेहे अभिमुखीकरण तालिम बीगु संस्था, स्वास्थ्य परीक्षण याइगु संस्था, बैंक, बीमा कम्पनी, शीप तथा तालिम बीगु संस्था, गन्तव्य देय्या रोजगारदाता सबन्धी सुचं थ्व प्रणालीइ वइगु खँ धाःगु दु ।थ्व प्रणालीया नमूना वंगु दँय् हे सुरु जूगु खःसा आः वइगु असोज १५ गते निसें थ्व प्रणाली पूवंक लागु जुइगु खँ श्रम मन्त्रालयं धाःगु दु ।
LEAVE YOUR COMMENTS