रूसय्र साइबर आक्रमणकारी तःधंगु पुचः ‘रिभिल’विरूद्ध तःधंगु कारवाही

एजेन्सी- विश्वय् साइबर आक्रमण यानाः ‘ब्लाय्कमेल’ याइगु छगू तःधंगु पुचःयात छिन्नभिन्न यायेत ताःलाःगु खँ रुसं धाःगु दु । रुसी अधिकारीतय्सं साइबर आक्रमणकारीतय्गु तःधंगु पुचः ‘रिभिल’या यक्व दुजःतय्त ज्वनाः मुद्दा न्ह्याकागु खँ धाःगु दु ।

अमेरिकां साइबर अक्रमणय् ल्हाः दुपिं थ्व पुचःया दुजःतय्त ज्वनेत ग्वाहालि याःपिंत छगू करोड अमेरिकी डलर सिरपाः बीगु घोषण यानातःगु दु । रुसी गुप्तचर निकाय एफएसबीं आः थुगु पुचःया ‘अस्तित्व हे मदयेक सफाया’ जूगु धाःगु दु ।

रुसी गुप्तचर निकायं अमेरिकां छ्वयाहःगु सुचंया अधारय् हे रिभिलविरुद्ध कारवाही न्ह्याकूगु खः । अथे खःसां रुसं थ्व पुचःया सुं नं दुजःतयात अमेरिकाय् सुपुर्दगी याइगु सम्भावना धाःसा मदु ।

रुसया सरकारी समाचार एजेन्सी तासं रिभिलं ‘खराब सफ्टवेयर दयेकाः विदेशी नागरिकतय् बैंक खातां संगठीत रुपं ध्यबा खुयाक कया वयाच्वंगु’ धकाः च्वंगु दु ।

एफएसबीं उगु पुचःपाखें ४० करोड रुसी मुद्रा रुबल (६६ करोड नेपाली) व न्हय्गू करोड नेपाली ध्यबा बराबरया क्रिप्टोकरेन्सी बरामद यानागु खँ धाःगु दु । उमिसं बैंकं ध्यबा खुयाः न्यानातःगु नीगलं मल्याक थिकेथिकेगु कार नं बरामद याःगु खः ।

एफएसबीं छगू वक्तव्य पिकासें धाःगु दु, ‘थ्व संगठीत आपराधिक पुचःया अस्तित्व समाप्त ज ूगु दु व उमिसं आपराधिक ज्याया निंतिं छ्यला वयाच्वंगु सूचंया पूर्वाधारयात नं छ्यले हे मफइगु यानाबी धुंकूगु दु ।’

अमेरिका व रुस दथुइ स्वापु ख्वाउँयाच्वंगु इलय् रुसपाखें तःधंगु साइबर आक्रमणकारी पुचःया अस्तित्व मदयेकाबियागु घोषणा वःगु खः । रिभिल पुचःयात ज्वनेत ताःलाःगु धयागु अमेरिका व रुस दथुइया साइबर स्वापू व साइबर अपराधय् महत्वपूर्ण पलाः जूगु खँ धाःगु दु ।
ताःई न्ह्यवनिसें पश्चिमा देय्तय्त निशाना दयेकाच्वंपिं ह्याकरतय्त रुसं सुरक्षा यानातःगु धकाः बिया वयाच्वंगु द्वपंयात रुसं अस्वीकार यासें थुकियात बेवास्ता याना वयाच्वंगु खः । तर जेनेभाय् जूगु छगू सहलहय् रुसी राष्ट्रपति भ्लादिमिर पुटिन व अमेरिकी राष्ट्रपति जो बाइडेन दथुइ ¥यान्समवेयरविरुद्ध गुकथं ल्वायेगु धयागु बारे खँ न्ह्याकेगु सहमति जूगु खः ।

थ्व सहमति जूगु छुं ई लिपा हे रुस व अमेरिकां साइबर अपराधविरुद्ध ताःई लिपा न्हापांगु मंकाः कारवाही न्ह्याकूगु खः । थुकिं निगू देय् दथुया स्वापू बांलाना वनीगु संकेत नं क्यंगु दु ।