प्रधानन्यायाधीशया नां सर्वसम्मत यायेगु सहमति
येँ (नेपालभाषा टाइम्स)÷सर्वोच्च अदालतय् प्वनाच्वंगु प्रधानन्यायाधीश छवाःया दुने नियुक्तिया नितिं सिफारिस यायेगु खँय् सत्ता पक्ष व विपक्ष सहमत जूगु दु । प्रमुख प्रतिपक्षी नेता केपी शर्मा ओलीया छेँय् म्हिगः च्वंगु बैठकय् उगु सहमति जूगु खः ।
म्हिगः ओलीया छेँय् प्रधानमन्त्री लिसें माओवादी केन्द्रया अध्यक्ष पुष्पकमल दाहाल, नेपाली कांग्रेसया सभापति शेरबहादुर देउवा व एमाले अध्यक्ष ओली दथुइ जूगु बैठकय् प्रधानन्यायाधीश नियुक्तिया नितिं सहजीकरण यायेगु सहमति जूगु खः ।
वंगु झिंप्यला न्ह्यवंनिसें सर्वोच्च अदालत कायम मुकामयया भरय् चले जुयाच्वंगु खः । म्हिगः प्रधानन्यायाधीश नियुक्त यायेत संवैधानिक परिषदया बैठक सःतेगु व नियुक्तिया नितिं सिफारिस यायेगु तयारी याःगु खः । संवैधानिक परिषद सम्बन्धी ऐन मदुगु कारणं परिषदया बैठक च्वने मफयाच्वंगु खः ।
संवैधानिक व्यवस्था कथं फुक्कं दुजःपिं उपस्थित जुयाः संवैधानिक परिषद्या बैठक च्वनेगु व उगु बैठकं सर्वसम्मत प्रधानन्यायाधीश नियुक्तिया नितिं सिफारिस याइगु खँ धाःगु दु । संवैधानिक परिषदय् दुजः जुयाच्वंपिं फुक्कं राजनीतिक दल व व्यक्तित्व लिसे सहमति यानाः प्रधानन्यायाधीशया नां सिफारिस यायेत्यंगु खः । तर ऐन मदयेकूगुलिं छवाःया दुने हे नियुक्ति सिफारिस यायेत समस्या जुइ फइगु सीदुगु दु ।
उकथं हे प्रधानन्यायाधीश नियुक्तिया नितिं संसदीय समिति नीस्वनेमाःगु खःसा आः तक संसदीय समिति नं नीमस्वंगु कारणं नं प्रधानन्यायाधीश नियुक्तिया सिफारिस यायेत समस्या वये फइगु खँ धाःगु दु ।
संविधानया धारा २८४ स संवैधानिक परिषद सम्बन्धी व्यवस्था यानातःगु दु । उगु व्यवस्था कथं परिषदय् प्रधानमन्त्री अध्यक्ष जुइसा प्रधानन्यायाधीश, प्रतिनिधिसभाया सभामुख, राष्ट्रिय सभाया अध्यक्ष, प्रतिनिधिसभाय् विपक्षी दलया नेता व प्रतिनिधिसभाया उपसभामुख दुजः जुइगु व्यवस्था दु ।
तर प्रधानन्यायाधीश पद प्वनाच्वंगुलिं वय्कःया पलेसा कानुन मन्त्री दुजः जुइगु व्यवस्था दु । प्रधानन्यायाधीश हे नियुक्तिया सिफारिस योमाःगुलिं कामु प्रधानन्यायाधीशयात धाःसा संवैधानिक परिषदया दुजःया रुपय् स्वीकार यानातःगु मदु ।
LEAVE YOUR COMMENTS