सूर्यविनायकय् समावेशी सायाः पिदन

ख्वप/ सूर्यविनायक नगरपालिका वडा नं. २ ज्याकुथिं न्हापांखुुसी समावेशी सायाः पिथंगु दु । २ वडा ज्याकुथिं दक्व जातजाति, समुदाय व धर्मावलम्बि दुथ्याकाः समावेशी सायाः पिथंगु खः ।
सापारु नखः दक्वं जातजाति, समुदायया मंकाः पर्व व संस्कृति जूगु व सांस्कृतिक कालबिल यायेगु ल्याखं थुकथं समावेशी सायाः पिथनागु २ वडाया वडाअध्यक्ष सोम प्रधानं कनादिल ।
नेवाः समुदायं च्याचा गुन्हुतकं झःझः धायेक हनीगु सायाःया अवसरय् घिन्तांघिसि लगायत थीथी सांस्कृतिक झाँकीसहितया सायाः अपनत्व ग्रहण यायेगु व सांस्कृृतिक आदानप्रदान यायेगु पर्वकथं सामावेशी रुपय् सायाः पिथनेगु ग्वसाः ग्वयागु वडाअध्यक्ष प्रधानं कनािदल ।
सूर्यविनायक नगरपालिकाय् हे न्हापांखुसी थुकथं समावेशी शैलीं सायाः पिथनेगु ज्या जूगु खःसा थुकियात वइगु दँय् नं निरन्तरता बिया वनेगु व आकिवंनिसें गुन्हुतक हनेगु झ्वलय् लिपांगु दिनय् थुकथं हे समावेशी रुपय् सायाः नखः खनेगु वय्‌कलं कनादिल ।
ख्वप जिल्लाया स्वंगू स्थानीय तह चाँगुनारायण, ख्वप व मध्यपुरथिमि नगरपालिकाया सङ्गमस्थल दुवाकोट दसवातं सुरु जूगु समावेशी सायाः, घिन्ताङघिसीलिसें परम्परागत प्याखं दुवाकोटया थीथी त्वालय् प्रदर्शन याःगु खः  ।