गौतमया सांसद पनेत रिट दर्ता

येँ (नेपालभाषा टाइम्स) – राष्ट्रियसभाय् न्हू नियुक्त जुयादीम्ह वामदेव गौतमयात राष्ट्रियसभा सदस्यया रुपय् ज्या यायेत पनेमाःगु माग यासें सर्वोच्च अदालतय् म्हिगः रिट दर्ता जूगु दु ।

वरिष्ठ अधिवक्ता दिनेश त्रिपाठीं गौतमया नियुक्ति असंवैधानिक जूगु धासें बदर यायेमाःगु माग यानाः निवेदन तःगु खः । रिट निवेदनयात कयाः वइगु बुधवाः पेशी जुइ । त्रिपाठीं दर्ता याःगु रिट निवेदनय् तत्काल राष्ट्रियसभा दुजःया रुपय् ज्या मयायेत व मयाकेत अन्तरिम आदेश नं माग यानातःगु दु। गौतमया नियुक्तिया निंतिं मन्त्रिपरिषदं याःगु सिफारिस असंवैधानिक जूगु धासें खारेज यायेमाःगु व राष्ट्रियसभाय् चुनाव बूपिंत यंकेगु ज्या जूगुलिं गज्याःपिं मनूयात राष्ट्रियसभाय् यंकेगु खः धइगु बारे ‘गाइडलाइन’ जारी यायेत नं निवेदनय् माग यानातःगु दु ।

मन्त्रिपरिषद्या सिफारिसय् गौतमयात असोज १ गते राष्ट्रपति विद्यादेवी भण्डारीं नेपाःया संविधानया धारा ८६ (२) या खण्ड ‘ख’ कथं राष्ट्रियसभा दुजलय् मनोनित याःगु खः । मनोनित जुइवं गौतमं पद व गोपनीयताया शपथ काःगु खः । ५९ म्ह दुजः दइगु राष्ट्रियसभाय् राष्ट्रपतिया सिफारिसय् स्वम्ह मनोनित जुइगु व्यवस्था दु। तर गौतमयात मन्त्रिपरिषदं सिफारिस याःगु कारणं विवाद ब्वलनाच्वंगु दु। गौतमयात राष्ट्रियसभाय् यंकेधुनेवं गौतमया विरुद्ध मेगु निगू रिट नं दर्ता जूगु दु ।

सम्बन्धित बुखँ

LEAVE YOUR COMMENTS